Usmaan Sonko !

            USMAAN SONKO

     Yimre he Usmaan Sonkoo

Usmaan ustii ɗo.

So juutde darngal wonno hakkilantaagal.

So juutde darngal wonno ganndal.

So juutde darngal wonno pinal.

So juutde darngal wonno ƴoƴre.

Koori Usmaan Sonko daɗetaake.

Fuuyi darngal no bamngal.

Mawni kunugal no ngabuyal.

Waasi teddungal no firawnayal.

Ko haali fof fawa ngoodooje no powal.

Nde wonno yahata jam he ngal niɓɓal.

Wele-lele wele-lele warii min he ngal kunugal.

Mate ko aan tan Geno rokkuno jaajngal.

Ndaw ko fuuyi ellee bamngal.

Aɗa hana tan e hakkunde pooyal.

Haalirde ngenndiire wontii ngemmbiire.

Nde ngal yiɗi haalde fof ngal dogana haalirde ngenndiire.

Ndee ko renndaande no naangal.

Fetta fuɗa moni kala he hakkunde koyal.

 Ndee wonaa jeytaare he ndee firtaare.

Dutal ko ɓooyi dow fof maa meeɗ jippaade.

Sonko sukko no maayɗo leliiɗo he ɗee genaale.

Aɗa luuka tan no powal.

Mbaanaari dow jeeri !

Fotndotaako fototaako.

Makki innde mum mahii ko he jammi jeeri.

Fuuta tooro.

Ful fulii fut.

Ful fulii Fulfulde.

Geno fulii fulɓe fulii Fulfulde.

Fulɓe ngonaa ngonat, fulɓe ngon.

Makki dogaani wajjikini.

Sibu pullo dogata wajjikinto.

Woto pooɗonoɗe sibu koyeera on ndirtat.

So maayde fertaaki-ma, maa gonɗi ngoolto.

Nde woɗɗaani nde ɓadti.

Usmaan Sonko ustii ɗo.

Sonko sonkii soŋkitii ɗo.

Innde Makki mahii ko he dow kammu.

Makki ko tokara Makki.

Makki mo Sayku Umaar Taal.

Kodda Aadama Aysa Elimaan Siree.

Koɗo subaka joom wuro nanage he hoyre.

Joom tijjaaniya.

Joom fuuta tooro he sokkoto.

Mahi fuuta mahori pinal he nder fulɓe.

Yehi acciri en Alh Saydu Nuuru Taal.

Mo tuubakooɓe nganndi njoñti.

Ngetii nganndi mbaawa ngoppii.

Usmaan Sonko.

Ngal toowa darngal ñirɓinoo jeesal.

Wulla tan no dawangal.

Wutta kine tan no bodlal.

Makki: 

M ko malaaɗo.

K ko kawral.

Laamtooro Siidiki Sal

Mbaroodi caliindi caltiindi ɓe ndiiño he fuuta.

Sonkoo, yoo Geno solko.

Sokka toon cokcoke cokcokinooje ɓernde haaside.

Yoo wuur Pulaagu.

Wuurna wuurnooɓe pulaagu.

Yoo Geno falo falotooɓe pulaagu.

Falotooɓe falorooɓe tooke mboddi.

Ciilal ngal wulli luuki kono wonɓe paamaani.

Yoo ñiiwa falo ngal goral faltoo ngal goral.

Ngal goral ellee ñiibal.

Ɓawli ellee ƴulmal.

Tekki daangal ellee rigaango ƴiiwongal.

Mawni beccal no tata firawna.

Yurbitii gaɓule no dote paaɓal.

Wooroo tottoo ndaw ko fuuyi ellee girjal.

Yoo Allah falo ngal neɗɗal.

Ngal neɗɗaagal mum neɗɗiti he neɗɗaagu.

Wooroo ndaw ko fuuyi jikku ellee girjal.

Koɗol Ngenndiyanke Joob.

Ñalnde Dewo 9 Jolal htnd 2025