Yumma Hawa he Baaba Aadama

Taani men ko baaba Aadama e yumma men Hawaa.

Koto maɓɓe leƴƴi winndere ngummi 

Nulaaɓe nulaa he golle makko njokkii.

So en pelliti eɗen pella jihaadi.

Eɗen pellito jihaadi ɓerɗe.

Fetelaaji eɗen taawna kure he conndi eɗen njogito.

Ɓeen mawɓe nulanooɓe he Diine tuugi-ɗen.

Pellitɗen dewal Allah ha abada en ngoppata.

So maayde eɗen pelliti.

En penata en ngujjata en ɗawata.

Waabiraaɓe keeceeje maɓɓe ngiwɗen.

Aɓe mbaɗdi aadi he Geno.

Ɗoftude ɓesngu he cukaagu.

Jannginde ɓe ɗemngal maɓɓe he Diine.

Daɗndu-ɓe heege he ɗomka.

Faabaade ɓe he boomaare.

Annabaaɓe ɓeen rewnooɓe ɗo.

Ko piɓle maɓɓe njogitiɗen.

Piɗtaali maɓɓe poofirten.

Beeli maɓɓe ɗuhortoɗen.

Barke ilooji maɓɓe calligorto-ɗen.

Iisaa ɗofti en ha keerol darti.

Daawal ngal ina juuti kono Nulaaɗo Muhammadu garal yeeso omo felliti.

So en pelliti ko Diine en piɗɗiɗto he ndii tuundi.

Sibu ko ɗum lormen he oo Diine.

Yummiraaɓe men ko waab'en he keeceeje.

Kaɗi en teɓɓitaade.

Kaɗi en seɓɓitaade.

Ngooƴelaaji nder reedu.

Pette he dumpaali.

Neeniraaɓe ko waab'en he keeceeje.

Neeniraaɓe men ndeeni en he jayngol.

Ñammini en ndemaandi he ndonaandi.

Yummiraaɓe ko yurminiiɓe yuŋginiiɓe.

Ɓuraaɓe doole yamƴiniiɓe.

Haɗaaɓe fotde he galleeji.

Haɗaaɓe fotde he renndooji.

Haɗaaɓe fotde he diine ɗawaaɓe.

Worɓe resooɓe ɓe njurmotaako.

Fotdeeji rewɓe ubbooɓe.

Cabbi luubotooɓe.

Daraniiɓe ɓurnude ɓee he dow ɓe.

Keeri Allah ɓe ndeenaani.

So Allah ko mawɗo omo foti huleede.

So kulol Allah ina yottina ngoo-to fonngo maayo, eɗen poti taccoyde.

So powle ina nguddi.

So tufnde ndee ina jogii jir-yirngal.

So hakkunde maayo ngoo ina jogii noodi.

Liwoogu liyoomi.

Hakkunde maayo silkitoomi.

Yaa aan Allah ndanndaa ɓee ɓuraaɓe doole.

Haɗaaɓe fotdeeji.

Suraaɓe he galleeji.

Goral ngal, ndee maayde miijo mum ina woɗɗiti.

Puuyngal purkitiingal.

Wutta kine no liwal.

Ina bakko no powal.

Rokka ɓee haɗa ɓee no ullungal.

Enen fof koto yumma men Hawa he Baaba men Aadama ngummiɗen.

Ɓaleeɓe he raneeɓe he oolɗuɓe Geno tagi en.

Maayde ko wootere koto genaale tan kuccuɗen.

Holko ɓurondirɗen so wonaa kulol Allah he toppitaade diine.

So ɗee maale malii aljanna eɗen ɓadlii.

Yoo Allah hisnan'en neeniraaɓe wallito en baabiraaɓe.

Ndimaagu wonaa ƴiiƴam.

Ndimaagu wonaa hinnde.

Ndimaagu wonaa leñol.

Ko wutte belaaɗo kala ina ɓoorno.

Neɗɗo ina fuunta neɗɗo hono mum.

Neɗɗo ina fuunta hay hoyre mum.

Kono neɗɗo waawa fuuntude Allah tagɗo ɗum.

Kaawis ndee winndere !!

Kaawis haɗi mi mawnude.

Raɓɓiɗi darnde haɗi toowngal.

Famɗini noppi haɗi ɗi mawnude.

Wumnu gite haɗi-ɗe jiyɗe.

Fooƴni-mi haɗi mi ɓuttitde.

Ndee winndere winndaande.

Winndiraande kuɗi ɓaleeji.

Kaawis am he ndee winndere !

Nde piɗtaali natti piɗtaali ngonti pirlitaaɗi 

Kudol Ngenndiyanke Joob 

Ñalnde Mawnde 30 Lwr Yarkomaa htnd 2025