Tiitoonde: AADI BIL-AADI

août 13, 2023

Ndee yimre winndaa ko ñalnde dewo 13 lewru Juko 2023 

13 Juko 2023

Aadi bil-aadi salaade aadi ɓuri firtude aadi.

Mi tamii ndee ɓooɗde mi fiɓii oo aadi.

Aadi wonaa mehre, sibu ɗum fiɓaani oo aadi.

Ɓe calii aadi ɓe caltii oo aadi mo ɓe piɓondirnoo e les kii lekki baddi.

Ɓe tokkiti aadi ɓe tokki ɗoon ɓe tawii ina faaɗi.

Ɓe kaali kono tawii ina sari en ndii aawdi.

Ɓe nduttii e jamirooje aɓe ndeentina joom en oo aadi.

Ɓe cili ɓe cilti kono fof ɓe ndoŋkii tokkude oo aadi.

Aadi bil-aadi salaade aadi ɓuri firtude oo aadi.

Mi roondiima oo aadi mi faliima ko ɓe kaali.

Maayde ko aadi mo joomiraaɗo waɗdi e men ɓuraana ina haali.

So maayde ko aadi nguurndam ne ko aadi, mo ɓiyi Aadama kala waɗdi e oo aadi.

Ndariimi e fonngo maayo mbiɗa yuurno ngoo maayo.

Keeri maggo yiyde ɗum yiytere ina faaɗi.

Aadi bil-aadi salaade aadi ɓuri firtude oo aadi.

Somi maayi mi timminaani oo aadi, maa mi accu caggal ko ɓe kaali.

Lekki kii ina toowi ŋabbude e makki ina tiiɗi.

Ɓe kooyni naange ɓe njiyi ange yaaji.

Diwooje ndiwi kono dow magge yottaade ina faaɗi.

Ɓe noddaama jamma kono en nanaani ko ɓe kaali.

Ɓe noddaama ñalawma kono e ɗereeji ɓe mbinndaani ko laaɓi.

Sabu oo aadi ɓe mbaɗdunoo e Geno kono ɓe njaɓaani.

Ɓe pirti ɓe piriri ɗum no ɓe paamri.

Aɓe padi nguu ñalngu ngu Geno firtaani oo aadi.

Dental ko tamondiren aadi mbaɗden tawa en pirtaani.

So won ɓe paamɗen paamaani e dental kaalanen-ɓe tawa en luuraani.

Cilen-ka cilkiten-ka hakkunde batu pukken-ka.

Njeewtiden goonga njerwen-ka haa ɗigga kaalen-ka.

Cuggee caggee e nder batu ngitten-ka.

Kaalden goonga no tuufeere mahen-ka.

Mbaɗden aadi bil-aadi tonngen-ka

Aadi bil-aadi salaade aadi ɓuri firtude oo aadi.

Mammadu Sammba Joob Murtuɗo leliima e ndee aññeere firtaani oo aadi.

Yero Dooro Jallo winndii defte mahii oo aadi.

Tijjaani Aan gowlaali mum keddiima e ndee maande ina ceedto oo aadi.

Fuuta jaloŋ, fuuta tooro, fuuta maasina, haa yottii adamawa en noddaama e ngal dental ngam oo aadi.

Kaalden nanondiren mbaɗden oo aadi.

Ligganoɗen leñol tawa en pirtaani oo aadi.

Ardiiɓe kaalda nanondira moƴƴina ngardiigu mbaɗda aadi.

Halfinaaɓe moƴƴina kalifaandi.

Ɓe ndaroo e potal tawa ɓe pirtaani oo aadi.

Kuule laawɗinaaɗe tawa ɓe njaɓɓaani.

Ɓe moƴƴina ngardiigu tawa aadi ɓe pirtaani.

Gardinaaɗo so mudda dottaaɗo timmi tawa lomtinde leelaani.

Ɓeyda hoolaare ɗo aadi en pirtaani.

Aadi bil-aadi salaade aadi ɓuri firtude aadi.

Holko firti oo aadi e nguu batu ngu min kaaldi ?

Peeje moƴƴe min ƴetti hay heen gooto miijo mum min lunndaaki.

Ngoɗɗitoɗen peeje añɓe ɓe miijooji mum en ngoɗɗaani.

So wonaa ɗuum ɓe tafa caru ɗo koongu woɗɗaani.

Ndaɗɗen peeje kanndoɗen nayeeɓe e sukaaɓe.

Laabi e jeereeji ɓe miijooji mum en ngoɗɗaani.

Nayeeɓe ko manngu dooki tijjiiɓe janngo woɗɗaani.

Sukaaɓe ko lulundiiɓe ɓe miijooji yoga heen penngiɗi hay tufnde taccaani.

Aadi bil-aadi salaade aadi ɓuri firtude aadi.

Giɗli e cehilaagal reeni ɗi ko aadi.

Ko o aadi min mbaɗdi e dental min pirtaani.

Kuɗol Ngenndiyanke Joob.

13 Juko 2023