Yimre: Koɗdigal

KOƊDIGAL,

Koɗdigal ko pele jamyamaaje.

Njahondiral ngam Geno enɗam jokkondiral.

Ɓesnguuji men ngam nehondiral.

Ballondiral tibaaji ngam toŋtondiral.

Haajuuji men he ngonka kollondiral.

Fof ko ngam yiylaade Geno jurmondiral.

Rewɓe he timmal he kala sahaa lewe galleeji dental he jeewte ngam ganndondiral.

Fof ko yiylaade Geno ngam koolondiral.

Enɗam pooɗa-ɗam ha lewe galleeji taccinaɗam.

Koɗdigal ko jahondiral ngam jokkere enɗam jaalɗondiral.

Gorko he gorko ngona tippondiral.

Debbo he debbo ngona jokkondiral.

Fof ha Geno seedto wonana janngo kisal.

Koɗden to ɓerɗe ngoppen luural.

Koɗdigal ko koolondiral Geno jaŋtii he nanondiral.

Njiɗondiren tabitinen ngoppen sikkitaare.

Jibina koongu adda jeertaare moƴƴaani.

Yoo en ndentu no haɓɓere tawa en ceertaani.

Ndenten no haayre tawa fusde en weeɓaani.

Koɗdigal ko koɗondiral ɓerɗe ceertaani.

Njooɗdoɗen miijooji ngostondiren.

Njooɗdoɗen haala kaaltiden.

Njooɗdoɗen ɓerɗe njiyndiren.

Kaalden goonga mahondiren.

Fof wonana en ɓamtaare Geno njetten.

Sibu koɗdigal ko koolondiral luural moƴƴaani.

So en pinii beete koofnondiren fof ɓeyda giɗli tawa ɓerɗe en ceertaani.

Ɓiɗɓe he jawdi mbillen ina firta koɗdigal jaalɗina tikkere Geno ɗum moƴƴani.

Ñukkindaali he cikkitaali jam he nder men ɓeydaani. 

Moni kala yoo teddin banndum yurmoo ko jam he nder men famɗaani.

Ngonen kaaƴe kaatane tawa en ceertaani.

Fof ko ngam dental to ɓerɗe tawa en ceertaani.

Debbo juumaajo juumtuɗo miijo mo karaali he ngooƴam kaanabbe nanngondiraani.

Juumtuɗo miijo mo innde he mantoore ndaartaani.

Debbo mahi dental siŋkiri ngal timmal he potal.

Aaminata yoo Geno loŋ gaño ma laŋka gaño ma, laŋkita yiɗɓe maa.

Miijo ma feri laabi fertii lappi walliti, yottini miijo yiɗɓe maa.

Naange fuɗii fuɗnaange.

Naange mutirii hirnaange.

Noddinaali kaaci fuɗnaange nanngondirii he hirnaange.

Maande sañnjinoore aadee nde haɗa mo lunndaare.

Maande tabinoore aadee ngootaagu nde haɗa mo sañnjaare.

Koɗdiiɗo moƴƴo ko timmal aadee ina foti siŋkoraade.

Maande mahiinde ko maande tabinoore gondigal haɗa en sañnjaare.

Koɗdigal ko koɗdigal ɓerɗe he miijooji moƴƴi haɗa en ceeraagu.

Kuɗol Ngenndiyanke Joob

Ñalnde mawbaare 01 lewru mbooy hitaande 2022 (Fr, poissy)

Miijo Aminata Gollo (MG)