Yimre, tiitoonde: Giɗo

Ñalnde mawnde 21 lewru Duujal htnd 2021

         (Poissy France mai)

Giɗo: giɗli ngonaa donngal kono teddeendi mum ina muusi.

Giɗli puɗata ko e ɓernde laya e hakkiile.

So jamma jenngi ha koode ñaari ndoogu fooyni moni kala ine miijo giɗo mum.

So jamma jenngii mi hocca kuɗol, mi wona e winndude ha ɓooya gite am mberloo gonɗi, ngam miijaade giɗo.

Ɗaccuki nana yaha mbiɗa fooyo giɗo.

Haa lefol kelle tati caafti ngiddumi; danawol ranwi ellee kosam ɓiraɗam.

Oolol oolɗi ellee nete.

Haako ñebbewol haakoɗini ellee beete mbayniigu.

Giɗo: maayde ustata giɗli kono ina jibina yeeweende.

Sahaaji ina ƴoogna ɓernde woyna gite.

Miijo hoota woɗɗa ñalnde mbayniigu waɗi.

Giɗo: so mbiɗa nana gowlaali ma mi haarata, mi haastata ma.

Giɗo: so mbiɗa nana dille ma ɓernde am ina weltoo.

Giɗo mo mi hulata.

Giɗo mo mi giddata.

Giɗo galle ma nana hakkunde leydi e kammu.

Allah mahi annabiijo Allah siŋki.

Soktataamo so wonaa uurul ayni.

Faatimata mentu labaaɗo, laaɓtuɗo mbaydi tago.

Giɗli pooli suukara njuumri e njuuman welde.

Tokara ummul qur'aana.

Giɗo tottam ɓernde ma e hakkille ma, ngaraa ha njeewten.

Lummben maayo Iisaa e Ibraahiima.

Lummben maayo Muusaa e Nuuhu teeɗano-ɗen ganngdinorde Geno toroɗen.

So maayde mi dogata.

So kulol mi giddata.

Ko aan woni fina yaynoo moosa yeeɓe.

Giɗo: so jamma jenngi haa come cirkii, mi ummoo mi jerminoo.

Mi lemoo nano e ñaamo, mi feerta gite mi roŋka yiyde ngam yeeweende giɗo.

Giɗo: Ñalnde mbayniɗaa mi jamma ndoŋku-mi ɗaanaade mbaalmi ko miijaade.

Pinmi pindu-mi e gite boɗeeje, ɓe laabndii mi.

Ɓe mbiy-mi holko woni ?

Mbiy-mi ko ngam yeeweende giɗo.

Giɗli mbeli haa ɓurtii kosam e nebam mum welde.

Ndogmi ndogan-mi boowal laaɗe diwooje tawmi giɗo am yehii, mbiymi yoo Allah waɗ jaaƴnje.

Giɗo: giɗli curimi curwini-mi, kaɗi mi ɗaanaade.

Leliimi haa feccere jamma nan-mi wulaango ngirñitii-mi tawmi wonaa giɗo.

Miijo hooti hootdi e yeeweende.

Giɗo: mi wonaa ƴiyal kono ŋolataa-mi so wonaa aan.

Giɗo: ƴeew am.

Giɗo: heɗto mi.

Giɗo: gite am mbaɗii beeli ngam Allah e miijaade ma.

Kuɗol Ngenndiyanke Joob

Rabat Madiina Gunaas