Yimre-Tiitoonde: Aduna

Ñalnde aaɓnde 5 mbooy hitaande 2021

 

Yimre-tiitoonde: Aduna

Aduna ko golle, moni kala yo dañ ko golli.

Aduna ko tinndi, moni kala yo dañ ko tinndi.

Aduna ko darnde, moni kala yo dañ ɗo darii.

Aduna ko daarti, moni kala yo waɗ ko moƴƴi mbele janngo ine daartanee.

Aduna ko waɗi, moni kala yo wood ko waɗi.

Aduna diisaare mum ine tiiɗi mo haɓɓi kala ɓoccitaade ine tiiɗi.

Aduna ko ngaari mo hawi kala daɗde ine tiiɗi.

Aduna ko henndu, mo dogdi e mum kala maa daɗoy

Aduna ko jullaare mo fergitii e mayre kala muusalla maa tinoy.

Aduna ko mbaroodi mo sippiri e mum fof maa warñoy.

Aduna ko ngelooba, mo waɗɗii ɗum fof maa toowoy.

Aduna ko ngelooba, mo waɗɗii ɗum fof maa jippoyo.

Aduna ko dennde, mo ñaamiinde fof maa tuutoy.

Aduna ko ñakaɓere, mo dogdii e mum fof maa gasoy.

Aduna ko dooño, sahaaji ine yaha ine waylo.

Aduna ko dooño, sahaaji kala mo hawri wutte mum ine wayloo.

Aduna ko lonngere, mo ñaamdunoo kala janngo maa tuutoy.

Aduna ko mbabba, baɗɗinooɗo kala ba tuuɗi.

Aduna ko nagge, ɓirnooɗo kala jiinnidii.

So aduna ko lammba, sippiro mum tasii.

So aduna ko ƴiiwoonde, ruulde mum saayi.

Kuɗol Ngenndiyanke Joob