YIMRE: DENTAL

 Ñalnde hoyrebiir 6 lewru Mbooy hitaande 2021

         Yimre: Mammadu Malal Siidibe

                     (Dental)

Dental ko caali.

Ko tugaale tati tammbii ki.

Ko aadi e beldal e peewal ndoondii kí.

Kala ɗii ɗoo ngal semmbaani, yerɓude-ki e yande-kí jommbaani.

Ngaree, ndennden jam e bone ko aadi mo ɓolɗaani.

So beldal e peewal catiima oon aadi ngaal dental wuurat ko juuti, maayaani.

Golle bannge haala bannge, sikkinaani, tuumnaani.

Kono deeyo ko huunde nde moƴƴaani, sibu ine jibina njeerto mo felnaaki.

Piilen koolaaɗo, coftuɗo kirjinoowo, mo ɗamaawu woodani.

Ko batu fewji, felliti yoo yiilirde golloro.

Moni kala ko halfinaa, moƴƴinde ɗum yo o darano.

Mo jaddii, salii luutndii, yo woɗɗine ko leelaani.

So wonaa ɗuum, raaɓa goɗɗo mo fiɓde tiiɗaani.

Yo waɗe ko haaldanoo so happu o yontii, tawde kay wonaa kuugal kesal, kiisngal lomtii.

Ɓee ɓurnee, ɓee njaasne, ko ko firtata dental.

Heewii ko ɗuum ko ɗum saaki ngootaagu ñiɓinoongu e kawral.

So ñamlanooɓe njoɓataa, ñamlooɓe keɓetaa.

So booñ fiɗɗii, horsii, dental woodataa.

Ndeke ɗuum, ko musiiba mo dara nanndataa.

Ngel heppi, ƴakki aawdi muum, ndiga o soñataa.

Jommbaani-mo woyde bojji ɗi o deƴƴataa.

Mo ñaami kala woofoonde nde o lelnanaa, nafa coppi o anndataa.

Ndaroɗen, tuten nguurnen ɗee dente.

E nder sahre kala yo ɗe ɓamte.

Ko e majje fawii ɓamtaare men.

Nekkude en ɗe jibinoyta ko haame men.

Ko dental roŋki gooto gaynataa.

So unooɓe cuuɗondirii naafɗe, gawri ɗiggataa.

Paamen mo faamaani , te haaɓre en ngondataa.

Ngoppen ɗaankiniiɗo mo fingol mum yontataa.

Mo hooynii naange ceeɗu yiyaani, goɗɗum o yiyataa.

Mo ɓamti gaɗa faaɓru e leydi o joƴƴina ko leelataa.

Gabbiiɗo daɗee ko o heɓtataa.

Mo fuuyni fof, wona jaasɗo mo dara firtataa.

So on mbinndii ɗemɗe mon, ko ine jaakna on woodataa.

Haaju mon, sokla mon, winndee majjataa.

Neesu mon e gannde mon ndontinee, njaastataa.

Ko binndol hisnata, saakta ganndal ngal rappataa.

Ko konngol haɗata jiiɓru, jiiɓta luurdunooɓe kaɓtataa.

So dental mon wonii, ndimaagu mon hisii.

So dental mon jaasii, njiyaagu mon fuɗii, ñiiɓii.

Ngenndiyanke Joob winnditii nde, kono winndi yimre nde ko Mammadu Malal Siidibe. En njettiimo he ndee yimre lobbere yimre heeriinde