Ngenndiyanke Joob

Kuɗol Ngenndiyanke Joob
Ñalnde njeslaare 19 korse hitaande 2019.

Hare nde ine roondi musiiba mawɗo kono nde jeertinta ko janngo! "Ooɗo janngo, ko janngo jannginoowo ɓeen yottaade Geno. waylo waylo aduna o, ine roondi musiiba mawɗo. Heɓɓitto aduna o ko ganndal pinal e ɓamtaare. Hay-ɗo won ko jojji ganndal heewi kono ellee hannde ɗuum seedtinaani ! So tawii gannda yaaji ngal golloraaka ngal huufiraaka ngalu leydi, walla ngal golliraaka e nder renndo firti ko ganndal ngal ko goobu wutte sahaaji ine sokla ruttineede to gooboowo !!!!

Yoo Geno addu jam afrik.

Ganndal heewi kono nuunɗal gasi. Jawdi heewi kono njurum gasi. Ɓesnguuji keewi kono jurmondiral hakkunde mum'en gasi, ɗo ngarɗaa fof njiyataa ko jiiduɓe neene e baaba ine ɗoŋondiri, ine tikkondiri. Jiiduɓe baaba kam hanti mbaɗtii toŋkondirde, koɗki koɗɗe e koɗorɗe natti. Renndo ngo wontii lekki, lekki ki fiindi piindi, ndiin piindi andi waɗi ndiyameeje ceertuɗe : Heen bannge ko daneejo tal, heen bannge ko boɗeejo coy, heen bannge ko haako ñabbe, “heen bannge ko cuurki, kiin cuurki, suurkatnoo ko Libi. Ko adii palastiin e irak" ɓe mbarondirii haa nayeeɓe ngontii sukaaɓe, sukaaɓe ngontii nayeeɓe, seemedɓe ngonti sagataaɓe, caggal nde sagataaɓe njarnaa kaaɗeeki maayde heddii kure e conndi ine nduka kala subaka beetɗo !! Ɓeen seemedɓe lomtii sagataaɓe yahrooɓe e duuɓi mum'en 35 ine cooyno goongaaji tawii cuusa haalde  !!!!

Kiin cuurki hannde dooki Mali malanoongo e sahaa Tumaani tuure, ɓuuɓanooɓe hay sinndo kisal woodaano no haanirta ni. Kiisngal hannde ngal woodaano !! Cooynagol tuubakiri ngalu ngonngu mali ngu, laamɗo sooda jaayndiyankooɓe gollotooɓe e aayaawo habrirde nde dowla ngenndiire mali cooda, jaagorɗe cooda; ngalu leydi rokka woɗeele. Farayse summbi sajii dañii jam sibu ɓesngu leydi kure e conndi mbaɗtii ndukde jamma e ñalawma ko ine tolnoo e ujunnaaje ujnnaaje ñalnde kala ko maayata e innama aadee !! Ko ɓuri heen heewde ko wiyooɓe mbiymi e wiymi e wiymaami, daaɗe ine codditee ko aldaa e kulol Geno toowɗo o. !!!! Geno ko muñƴo mo heppaani ñalɗi garooji.

Hannde ndimaagu heddiima e kunuɗe nattii e ɓerɗe. Kiin cuurki ko caaski, filñitere makki ine dooki denndaangal renndo afriknaaɓe, alaa to ki woppata". Ndiyam mboɗojam ɗam ko ƴiiƴam. Ndiyam ndanejam ɗam ko goonga Geno mo waylotaako. Haako ñebbe ko, ko penaale dogooje e aduna ɗe. Aduna hannde o nattii muñondiral wontii muñcondiral waɗi noon ko laamu tuubakiri teeŋti e laamu leydi farayse. Waawi ittude ɗee caɗeele ko jaŋde pinal e ganndal.

Ngenndiyanke Joob