Lannda kisal senegaal

Ndee yimre diidaa konde abdullaay wadda ƴattii jiknaabe makki sal, fawi ɗumen cukuñaagu e njar ƴiiƴam. Mettere mawnde wonanimi Heen haa laawiimi Heen no feewi. Laawogol am e mettere am nde no fotiri no jey sabaabu haa kaalmi ko hulbinii e abdullaay wadda e ko feewti e iwdi mum, haa ɗum jey sabaabu yimbe makko nannooɓe mbiɗo haala ɗum tawii kadi mbiɗo renndi e mumen jokkorɗe goɗɗe ɗe ngonaa dawrugol ngari nokku am yaafnaade. Ɓe mbii kam ko abdullaay wadda haali ko hawranaani hay gooto e maɓɓe yomi yaafo ɓe sabu hay sinno ko makki wiyaa eɓe paami Fulbe fof njaggiri ɗum ko kañum'en fof wadda ƴattii, ndaarti hoynude. Ɓe ñaagiimi yoo mi nattu haalde ko puɗɗiimi haalde e wadda ko. Njaɓmi teddungal koyɗe maɓɓe haa gallam. Ko e oon saanga nder jamma ummiimi ndiidmi ndee yimre.

Cukalel ngenaar naajo

Eehey ma ɓiɗɗo ngenaarnaajo
Dono ngenaar koliyaajo
Sagata paarnorɗo mo golle jaambaaro
oon iwdi ngenaar e daaɗe gelooɗe
Ɓeen ɓe ngenaar, ɓe ñaalaaɗe mbaawa
Rewnooɓe jalawaali mbaaltoya saarabaa
Ñalɗi yawmaaji jeeri koli e ndoondaagu. To kummballi ndillata,
Juñ-juŋaaji e yonta satigaagu.
Bawɗi ceɗɗaagu koliya e boowe jañ-njooli.
Dille alamari mo koliyaaɓe ñannde e waalngo gunndabi.
Ɓulniiɓe ceene bilbasi e njaareende
Boowal ɓokki sammba gelaajo jeegi,  penngal Ummu latooma.
Bawɗi alamari mbelni jeeysiiji e dingire kaataaje.
Kontimpaaji banndiraaɓe rewɓe ŋarɗini waso yontaaɓe
Toon to jañ-njooli satigi welingaraa naaɓe.
Ɓeen rewɓe e worɓe waawɓe ñalaaɗe.
Gila puɗɗorɗe koliya to gelleeje birom saare.
Haa to cuuɗi seɓɓe koliyaaɓe faarnorde ceɗɗaagu.
Horkaƴere afo suudu mawndu ceɗɗaagu.
Saare taaniraaɓe faarnoriiɓe jaɓɓe sule njaay.
Nde pelol ndimaagu dillini rewɓe seɓɓe koliyaaɓe.
Roondinooɓe sabaabu pusgu koliya horkaƴere naaɓe.
E saanga tefngooji jañ-njooji satigi sule njaay

Laɓɓitingol fergooji gure seɓɓe koliyaaɓe.
Ko heen njañ-njooli woni yuman gure jeeɗiɗi koliyaaɓe.
Darni coksokɗe baadel e welingaraa jañ-njooli.
Feranɓe ciloñ-eerem, looñcani lojju ngijlonnaaɓe.
Won jaaƴcinooɓe heewɓe to jowol e yowi loonde.
Ndaar guuriiki koliyaaɓe ko e saare taaniraaɓe.
Totti alanaa, alanaa wuro, Alanaa ladde e dente susnooɓe.
Ko ngartameeje ngenaar mo dille jeysi koliyaaɓe.
To mooolete daɗee, suusɓe mooltaani mooliiɓe.
Ɓeen suuɓtinooɓe faarnoraade garal maayde.
Ndogi ñalñalol dewal gacce maayde.
Fergo fetti seedtini gure koliyaaɓe leelaani.
Ƴellitnooɓe kinɗe, kuɓɓi jeyli cari peete, njalmiti ñifaani.
To palimpa ngenaar otti to lojju e welingaraaɓe.
Takko leegal tillere e jookli elimaan lewaanaaɓe.
Eehey ma ɓiɗɗo mo inna ngenaarnaajo.
Mo enɗe palfatotiri e asko ngenaarnaaɓe.
Oon inna Kummba Aamadu jawli hasan saajo.
Mo Aminata hasan e faatimata hasan saajo
Rokkunooɓe tiinndi wuro gaŋki e garbaaji koliyaaɓe.
Piilti to pele siiñcuɓe mo ceɗɗo koliyaajo  julayel.
To lowe lommbi e tufnde saadel e gele noodi.
Jeewru Aawdi Hammadi sawa jaara saadel naajo.
Ndoŋngeejo aawdi enɗam suudu mawndu koteynaaɓe.
Haa sattidaa jeeri e waalo tummbere pale ndañcaandi.

Jaatiiji dewol ma to kummba Aamadu jawli hasan saajo.
Jooltuɗi jokke to ndoŋngooɓe, sal-salɓe, njaayɓe, koteynaaɓe e cimmbooɓe.
Ooy saare nder jeejegol mo ndulumaaji funeeɓe.
To pulaagu, ceɗɗaagu e seereraagu mbaddi ngarmi-ngaraa teskaaɗo.
To maale wuro tabitinaa tunndaani.
E darnde silatigi baañoowo kuɓɓuɗo.
Baañoowo danndunooɗo saare e coŋngoori ladde.
Oon silatigi ŋanaa taanum  Aamadu buuɗi.
Ngarmi-ngaraa makko taktakiri saabii ngonka wuro leelaani.
Nde baydel sal e coŋngoori mbaddi adaa e maayde.
Taawi gisaan ina holliri worɓe ɗiɗo maayooɓe.
Oon dey diidi bolol fooyre Aamadu abdul maalik to ndulumaaji funeeɓe.
Mo Usmaan elibanaa dummbe sawa takal hammee yettum birom to gedenaaɓe.
Hokkuno wonki mum ngam maale wuro ɓooyooje.
Ɗuum ko faaro e daartol funeeɓe.
Nde yaanoonde artiri ko hesɗi yuɓɓini ganniiji.
Finaa tawaa e kesiri njoowi mbaylaandi.
Geno tottuma, waylaani, tabitini yorbaani.
Nguura ko juuti mo jeeri koli e ndoondaagu.
Cellaa, naywaaa, haa kaaɓaa dontuɗo ceɗɗaagu.
Geno dannduma e yeeweende nayewaagu.
Haa daartooɓe lomtoo e belɗi noppi deƴƴaaka.
Ina haalte ko juuti haastaka.
Kisal wiima yaa feŋ, feŋre nde peŋtoowo jibinaaka.
Ɗuum wonta koolol ngonka e peeje timmuɗe ngaynaaka.
Ka Geno resndumaa gaynaako jofnoowo mo soŋnganaaka.
Ko ndeen kisal wiimaa guddu caret awñete kude paate daŋnguraan.

Mammadu Dem
Renndiyanke ngenaar gooto e sagataaɓe ngenaar e daaɗe Gelooɗe.
Mo suudu mawndu siñcaan siñcu garbanaaɓe.