Tiitoonde: Katante ngenndi

Ñalnde njeslaare 22 Jolal hitaande 2018)" ina hawri he 14 lewru raabiya al-awal hitaande 1440 caggal jibineede Annabi Iisa ɓiyi Mariyam, Mariyam ɓiyi Hannatu, ɓiyi Umraan " yoo yurmeende Allah won he maɓɓe (aamiin).

NGENNDIYAŊKE JOOB

Komi jannguɗo seeɗa pulaar juurniiɗo payka he celluka pulaar fulfulde kumpitiiɗo, kaɓantooɗo ndimaagu he ɓamtaare daraniiɗo ƴellitde ɗemɗe ngenndiije teeŋti he ɗemngal pulaar fulfulde. Jarlitaniiɗo leñol ngam Allah ɓolo jawdi wonaa ɗaɓɓitoowo, ko ƴellitde gannde toowɗe artirde he ngenndi, riiwtude majjere he humambinnaagu ƴellitde pinal, he riiwtude ndool-ndoolagu.

Haɓanaade leydi he diiwaan ittude sooño wallude nayeeɓe no nguurdi, en nguurata tawa en njanngaani, tawde ko ganndal riiwtata miskinaagu addata jam he nder leydi faabo leñol, wuurtina coɗi ɓamtaare.

Ngel janngaani jannginaaka
Ngel faamaani famminaaka
Ngel anndaani anndinaaka
pulaar ko ɗemngal no ɗemɗe ngenndiije
Njanngen piren pacciren ko ɗuum wonanta en janngo ɓamtaare

Maaw-maaw he mawnikinaare ina laaɓi ko kañum woni kelu hoyre he hakkille teppiiɗo he mbaasam neɗɗaagu.
Ngoppen maaw-maaw he mawnikinaare
Ɓiɓɓe leydi yoo nanondir ngollo ngoppa mawnikinaare, koowngu ko maale mbon-nehdaagu he waasde ganndal ko tuundi mawndi ndi ndiyam laɓɓinde ɗum weeɓaani

Njanngen njannginen
Pinen pindinen
Mo janngii yoo janngin
mo finii yoo findin
mo dañii yoo wallu
Sibu aduna ñiiɓaaki koko ɓaari
Wuurde bonaani maayde ɓuri bonde ko wuura haa maaya tawa alaa ko baɗtini
Guurɗo fof ko maayoowo, maayɗo fof ko gummittooɗo golle moƴƴe he bonɗe ñalnde heen ko peññinteeɗe.

Pilñitoɗen ɗilñitoɗen ngoppen maaw-maaw he kareeli ngoppen seerenɓe wileeɓe tuutooɓe he piɓi ko lomtiiɓe laabudeeɓe diisnotooɓe diisneteeɓe mbordi janngo yarneteeɓe mboddi janngo fiileteeɓe tooke mayri yarneteeɓe.

Kuɗol
Ngenndiyanke Joob
Maccungel Allah