Ɗemngal am) (Mammadu Sammba Joob Murtuɗo

Ɗemngal am.

Hol ko ɓuri suukara njuumri e njuumaan welde.

So wonaa ndimaagu, e laamu kiisngu tuubakooɓe.

Neɗɗaagal men koɓe yoolnooɓe.

Fulla men e faayiida men koɓe fuuynunooɓe.

Ɗemngal men e ɓakke irnooɓe.

Sabu yenananoode neɗɗo halfata neɗɗo banndum tawa heedaani ɗum e hakkille mum.

Ɗaaynaani ɗum, dummbaani ɗum.

Ko ɗemngal seerndi neɗɗo e dammuwol sakkatata ganndal ngal reenata binndol.

En keɓii koye men fof en puɗɗitiima, yaawaare ɓooynde en caltiima.

Kaalen binnden ɗemngal men.

Nguurtinen daari men ngamri men tinndi men cifti men pijirlooji men.

Ko ɗuum woni ɗaɗi neɗɗaagal men.

 Ballitooji toownude ɗilñitde pinal men.

Yaakaare nguurndam men.

Piren gannde ɗee fof e ɗemngal men.

Ko ɗuum woni sodorde ɓamtaare men 

En mbiyi tuubakooɓe e kala yiɗɓe yeddude en ko en haal-pulaar en.

Haŋki hannde janngo ɓaawo janngo ha abada, en caltiima ɓe nuska ɗemngal men.

Ɓe njaɓɓa martabaaji men.

Ɓamtaare ɗemngal laaɓndii ko daragol dadagol leƴƴi pilñitiiɗi pooɗantooɗi soppude geƴƴelle teddeendi haŋki misibbaaji joom jawɗeele hakkunde leyɗeele.

 Sabu  yiɗde semmbinde neɗɗaagal mum'en.

Fiɗɗude haa laaɓa ndimaagu mum'en.

Sabu janngude e winndude ɗemɗe mum'en.

Fedde ɓamtoore Pulaar ko fedde men riiwtoore niɓɓere haa leerna neɗɗaagal men.

So yahdu yontii joɗnde alaa.

So darnde yontii lende alaa.

Pooye e pedle ɓamtooje Pulaar kuɓɓii woto docotte ŋakku.

Kuɗol Mammadu Sammba Joob (Murtuɗo) ! Yurmeende Geno heeriinde yoo won e makko sabu barke Alɓuraanil Kariim.

NJ