Tiitoonde Ngoone Saliw !

Pulaagu ko ƴiiƴam keelelam.

Pulaagu ko wootere e pedle inɗe Diine.

Pulaagu ko haayre mahaande Geno.

Mahaande mahta no fusde nde weeɓata.

Pullo ko gooto noddaaɗo he innde leñol.

Fulɓe ko duurtaande wayli wonti keewal.

Tukuloor min njeyaa, ko waylude lasli adda pene.

Ngam daɗɗude peeje he leñol.

Ustude doole wara-ɓe neɗɗaagu.

Waɗtaɓe jiyaaɓe haɗaɓe fotdeeji.

Ɓe njooɗo to gannginorde ɓe lunndoo.

Ɓe njooɗo to Galle diisnondiral ɓooɗe ɓe mberloo.

So en ndillaani kaaƴe ɓe mberloo.

So en ndaalaani kure ɓe mberloo.

Ɓe pooɗanoo en warde ndimaagu.

Ɓe paloo neɗɗaagu ɓe kaɗa en jiyɗe.

Usmaan Sonkoo, rewii ɗo, ɓe ndoondi en mette.

Won heen njehii kono gacce nawii.

Ɓe njooɓanooki gaawe ceekooje becce ngitta mette.

Makki mahnooɗo Senegaal haɗi en heege.

Senegaal ko senndi en he kaa laana.

Sennda en he ngal awƴal.

Sonkoo tammbi Galle diisnondire.

Jaggiti galle Laamorgo.

ɓurondiri ɓee he dow ɓee.

Diine he pinal o werlii.

Pinal ngenndi he nder leydi o ubbii.

O aawi koongu he ngañgu.

O sari en neɗɗaagu on haɗi en ngootaagu.

Jam ndaarta fuɗnaange he hiirnaange.

Joɓojji tiimtindi he maamaaje njennooru puɗɗi.

Ngoone Saliw, baa njarla ndakiiwa yottaaki.

Hannde he dow ndii leydi nguurndam ma jaraani.

Ngoone Saliw mbabba njarla ba dimngal famɗiraani.

Ngoone Saliw so nguurndam ko nafoore ɗam maa jaasti.

Ngoone Saliw so nguurndam ko Diine ɗam ma a waasi.

Aan he ɗii gorbi poɗɗi no lelli.

Ngoone Saliw:

So duggirde ma heewi mbaarudi yettu sabaabu.

Galle Sayku Umaar Taal.

Galle Ahmadu Bammba Bah.

Galle Alh Maalik SIH.

Galle Alh Muhammadu Saydu Bah.

Daaka fuɗɗaani Senegaal kono Daaka fuɗii he Senegaal.

Barke he baraaji carii alaa ɗo heddii.

Ngoone Saliw:

So fulɓe njennuɗa, barke he baraaji ɓe ndaɗi.

Annduɓe he alɗuɓe ɓe ndañii.

Yontaaɓe leñol Geno yeɗii.

Mammadu Sammba Joob Murtuɗo.

Alh Tijjaani Aan.

Yero Dooro Jallo.

Alh Saydu Kan.

Gila he Muusaa Diine ɓe ndaɗii.

Ha Nulaaɗo Allah eewni ndoole ɓe njaɓii.

Gannde toowɗe ɓe njanngii.

Ceerno Jalaali Diine Bah.

Abuu SIH.

Hamme Aamadu Lih.

Muhammed Faliil SIH (Pullo Gaynaako).

Ibraahiima Umaar Kan.

Gelongal Bah.

Njaatiraaɓe amen he waabiraaɓe.

Tekki pinal ndoondi ganndal.

Ngoone Saliw kaa njaasba nguurba he loope.

Leliiba ina fitoo he nder loope ina wiɗoo.

To beeli gudduɗi.

To ladde sukkunde.

To tufɗe ɓeeɓɗe.

To nder mum aɗa huɗoo.

Min nduwaaki yoo Geno hoynuma.

Kono woto Geno ɓamtuma.

Min nduwaaki yoo Geno ware.

Kono woto Geno wuurne.

Yaa barke ndoogu he puɗal naange !

Kuɗol Ngenndiyanke Joob

Ñalnde Dewo 5 lewru Yarkomaa htnd 2025