Yimre, Saganke

Saganke:

Caŋnuɗo ceŋɗe he caŋaale mum.

So wertaango he weraango mum.

Diƴƴe he diiñorɗe mum.

Cewle he ilooji mum.

Tule he jipporɗe mum.

So maaje ɗee ɓeeɓi.

Ilooji ɗii pajjii.

Jeeri ndii ndogii.

Waalo he kolaaɗe ɓeeɓtii.

Joomiraaɗo joom baɗe he baawɗe teeŋtinii.

Konngol he defte, jiiɓru jiiɓtii.

Oon Saganke mballinii-mi baɗlal o addii.

Wal-fatuhuu diɗɗe he keewal o tijjii.

Waraa'itannaasa baɗlal he yurmeende o addii.

Ko Nulaaɗo gooto yurmeende o hooli.

Madiina he ngal gural o jaɓɓii.

Ñalnde mburaangu dicci koppi Makka hooli.

Penaale njuli njurbitii.

Ƴiiwoonde jam feggii baade cookii.

Saganke saggitii en he Diine konnguɗi o suutii.

Mawɓe he sukaaɓe Diine o eewnii.

Maale ɓamtaare janngo eɗen tijjii.

Eh aljanna ko kañum ɗaɓɓitii.

Miin komi golluɗo ha yurmeende Geno ɓadtitii.

Pergitooje kaɗa en ndee waadere.

Pergitooje kaɗa en ndee abbere.

Pergitooje kaɗa en ndee yeɗere.

Ko ɗoo lumminii-mi ha tiiɗi njattinii-mi.

Makka he Madiina Diine mballinii-mi.

Aduna ko ha seeɗa laakara ɓadtii-mi.

Dow ceɓetel-leɓetel lekki ngon-mi, saamde mi he leydi miɗo ɓadtii.

Miɗo wakkii dannga tenngaade miɗo tenngii.

Lohi miɗo dadii silaama miɗo jogitii.

Fetel miɗo wakkii.

Kure he conndi miɗo dadtii.

So mbaroodi dillii kure he fetel miɗo jogitii.

Rawaandu mi fooɗi kure tuy-tuy mi woppitii.

Barogal ari ina ajjitii.

Silaama mi sortii reedu mi waagii.

Goɗngal mi hawrii silaama he fetel majjii.

Kure he conndi mi gaynii.

Barogal haaci maayde mi hulii.

Ndogmi, dannga he tenngaade mi waasi.

Paɗe he punndi he nder doogu mi faaydii.

Yettude sabaabu ko he Diine jeyaa.

Haalde en innde Nulaaɗo ko he ɗuum tawaa.

Ina waɗɗii en he kala sahaa.

Puɗi puɗooji en ɓaawo ina tijjaa.

Kala he ɗee gure moƴƴere ina tijjaa.

Ciloñ he Boyinnaji ina jaɓaa.

Duule ƴoogi he ɓulli ɓulooji mbelɗam.

Mbeltinoojam ɓerɗe he piɗtaali.

Hamme he Ahmad caatiiɗam.

Ndeeliɗam he fuuta ŋakkaani-ɗam.

Riginoonde fuɗnaange rokki hirnaange.

Ɓe teeɗaniinde rewo worgo jaɓɓiinde.

Ruulde mawnde worgoyaŋkoore.

Innaande Ahmadu ɓiyii Muhammdu.

Madiina Gunaas seydi Bah tuccitii-mi.

Miɗo manta ha to Ahmadu Tijjaani njottii-mi.

Juuɗe poortu-mi duwaawu mbeeɗii-mi.

So Pulaar ina woya woondu mum ngoɗɗitii-mi.

Noddi ko baasal he ŋakkere pellital sagataaɓe.

Jalaali jalbini en ngal ɗemngal walliti en he ngal pulal.

O hollitii en Pulaar ko ɗemngal.

So janngaama ngenndi ngal tammboto.

Sariyaaji hadiseeje he maggal firoto.

Farayseere he Anngele potondirɗen.

So en pelliti en nduttaaki caggal dow majje en njottoto.

Pulaar ɓurani-mi tato tatotooɓe taatna-mi he taate tati.

Jawdi ɓiɗɗo he debbo.

Pulaar walli-mi he Diine ha ndiiñii-mi he diiñe diine.

Janngini-mi A Allah anndini-mi.

Janngini-mi Ɓ ɓamtaare anndini-mi.

Janngini-mi Ɗ ɗaɓɓaande ganndal fammini-mi.

So Pulaar wuuri mi wuurat.

So maayi mi maayat.

Kuɗol Ngenndiyanke Joob