Yimre, kappiteen tuure
Ngenndiyanke Joob
Tuutnuɗo min ñalnde juulde taaske.
Min tinaani min maataani haa tol-tol min nani.
Haa juuloynooɓe iidi taaske ɗuggiti kaaƴe kaaci.
Kaɗi en kaɗti en pelmii en e ngoo felo.
Tawii saabi ɗum ko ngal kormbal no gorbal.
Boɗowal no jeynge laakara no toon caasal.
Kappiteen tuure mi wiyataama Umaar sibu a timmaani kalfinaaɗo ngam suusde ngal goongal.
Yoo Geno firtu firo ma.
Firta firorde firo ma.
Lummina ibiliisa dow keeci ma.
Faloo faltoo balɗe ma.
Kin-hinol gacce ngona foofirde ma.
Ñalnde janngo firawna wona jaɓɓorde ma.
Abaa jaali wona diisnondirɗo ma.
Yoo Geno loŋ koloŋloŋe ma.
Laŋka jiyɗe ɓernde ma.
Geno ɓoora laamu ma.
Ɓoora wallodiiɓe ma.
Ɓoora laamu kala lamminɗo ma.
Yoo gacce ngon suddaare ma.
Ngona waaborde keeci ma.
Aan koyɗo dunaa hoyti ngenndiiru ma.
Kappiteen tuure:
K kalkiiɗo ɓoccitii diine mum.
P poocciiɗo e aññeere mum
I mo innde ibiliisa liɓi ɗum.
T tijjiiɗo jeynge janngo mum
E taƴɗo enɗam findini ibiliisa e ɗoyngol mum
N mo neɗɗaagu alaa e mum.
U tumaraŋke ngenndi mum.
R rawaandu woɗeeru tijjiindu bone mum.
Yoo Geno loŋe loŋka loŋtooɓe ma.
Kaa rawaandu woɗeeru ndu dawaaɗi ngeli ɗum.
Kappiteen Umaar tuure tuutnuɗo juulɓe ñalnde taaske.
Yoo Geno firtu balɗe ma firta firorde balɗe ma.
Holi lootooɓe ngal gorbal?
Hasnooɓe ngal dawangal?
Duwantooɓe ngal dutal.
Fooƴi wojji no ciilal.
Yungini no ullungal.
Onon sikkuɓe on pooli !
Ndee hare jam on ndañi.
Maataw kasaŋka nder mum on koyii.
Neɗɗon ndaɓɓon no ciilon.
Cukukon no ndiidon.
Oɗon poti no maayde janngo paɓɓon.
Ngadi-kon kono cakkitii-kon.
Cakkitii-kon kono janngo aljanna paɓɓitii-kon.
Sibu e oo ganndo mbonam nehdaagu purkitii-kon.
Yoo Geno loŋ on janngo o laŋka on.
On pirtii pitti ɓamtaare mon.
On piɓii piɓle firtaare mon.
Diisaare ɓoggi baasal mon.
Diisaare ɓoggi firtaare mon.
Yoo Geno loŋ on, loŋka on, loŋa wallodiiɓe mon.
Kuɗol Ngenndiyanke Joob
Ñalnde 24 lewru korse 2024
Rabat (Senegaal)
Commentaires
Enregistrer un commentaire