Nguurndam C. Ahmadu Jallo (Aynimaadi)

Ñalnde hoyre-biir 6 Siilto 2024

Nguurndam gootal e jaale diine dental Madiina Gunaas. Hayso ngaal jaalal ngal jooɗi ko Aynimaadi (Ɓunndu)'' Ceerno Alh Ahmadu Jallo to ''Aynimaadi Rta'' <-- nguurndam oo gorko darodinooɗo e Ceerno Alh Muhammadu Saydu Bah RTA to batte diine siimtude ɗum wonaa ko weeɓi, kono ko noon ko waɗde jubbande heddoo e taarik. Nde tawnoo kala ko winnda moofta (maraa) ina jogii ko naftata e nder renndo, walla e renndooji jogorɗi aroyde e muddaaji payɗi arde. Tawii baɗlal e ngol ciimtol ko Ceerno Hamme ɓiyi Ceerno Ahmadu Jallo to ''Aynimaadi, Ɓunndu, ko o gooto e doosgal diine islaam kisngal kerngal guuurnoongal e Ceerno Seek Siraaji Diine, Seek Alh Muhammadu Saydu Bah RTA (MG)'' ngol ciimtol ko ɓiyii Ceerno Alh Ahmadu Jallo to ''Aynimaadi'' ina wiyee ceerno Hamme Jallo. Ko kanko tigi waɗata daartol ngol eɗen mbinndito ɗum ngam wonana renndo ngo nafooje keeriɗe janngo. En puɗɗiima tigi naatde e ndaganndi ndi, ko ɗuum waɗi janngoowo o fuɗɗiima tigi jappude noppi ngam feɗɗitde ɓernde mum ndee mbele ko o janngata koo ina naata e nder hakkille makko. Eɗen mbiya janngoo o yo ɓeydu tigi softude e hirjinde ruuhu makko o, e yiɗde roɓindaade daartol ngol" banndiraaɓe musiɗɓe tedduɓe; daartol ina jogii tigi-rigi ko naftata e nder renndo, sibu ina jeyaa e ko famminta yontaaji garooji ko wuurano haŋki, e jotondirooji leñol hakkunde renndooji goɗɗi; ko ɗuum duttorɗe keeriɗe, so tawii yontaaji garooji ngarii ndaña ɗo tuugni e renndo mum en. Ndokken yeru: hannde enen fulɓe eɗen keewi wiyde daartol haɗata majjere, artira majjunooɓe, findina ɗaaninooɓe, hirjina lohnooɓe.