Tiitoonde: Dawriyanke

Raamata Lih, cukalel laaɓa juuɗe ñaamdata ko e mawɓe, debbo pullo dawriyanke. Jibinaaɗo Senegaal he diiwaan Ɓunndu ko toon o waɗi jaŋde makko les-lesiire haa o yottii fannu toowɗo. O waɗi njillu makko leydi Waala Fenndoo. Nganndiraandi farayse he hitaande 2008 o jokkiti ɗo jaŋde makko fannuyankoore to senngo dawrugol. O tafi lannda makko, kaan lannda jokkondiri e lannda APR ɓe ndenndi dawrugol; kaan woni lannda laamiika hannde ngenndi Senegaal, Hoyreejo mawɗo leydi Senegaal Alh Makki Aamadu Buuɗi Sal, gorko mo Ndulumaaji demɓe he nder fuuta tooro. Raamata Lih koo daraniiɗo dawrugol pinɗo paamɗo cemmbuɗo baawɗo ko gollata koo. En kaaɗnat ɗo sibu wiyde ina haala ndii mbaroodi ndewri wonaa ko weeɓi, jam he kisal Geno yoo ngon he makko, Geno yottina fayndaare (Aamiin). Kuɗol Ngenndiyanke Joob, jeyaaɗo cuuɗi men Rabat hoɗngo he diiwaan Madiina Gunaas.

Ñalnde mawnde 3 Jolal 2023

       Ndee yimre diida

Tiitoonde Dawrugol 

Raamata Lih 

Tampere tampinoore en naange fuɗa.

Leppen cep warñeende ngam nguleendi he men daago werto. 

Sammita en he caɗeele ɓikkon magge he dow keeceeje fawa.

So naange fuɗii en fuɗnaange.

Naange fuɗii en hiirnaange.

Naange fuɗii en rewo he wargo.

Nge dariima en hakkunde hoore.

So bojji warñeende waɗii.

Haa warñeende saawi baade ndegiima he ɓalndu.

Miijo hooti fuuta he ɓunndu maamaaru.

Buubu ayni nagge pul-fule he kuumen mum.

Maalik he taaniraaɓe mum ngoppi saawaawo.

Saawaawo ganndal debbii ɓunndu bannaaru bun buubu Maalik.

Cukalel laaɓa juuɗe ngel mawɓe ngelataa.

Jibinaa ɓunndu waɗi toon jaŋde mum les-lesiire.

Haa yottii he jaŋde hakkundeere he gannde toowɗe.

Tafi goomu katanteewu kaɓantoongu ngootaagu aadeee.

Kaɓantoongu ganndal he neɗɗaagu aadee.

Teeŋti he koolkistoongu fotde ɓiɗɓe ngenndi.

Raamata Lih, mi limta alkule innde maa.

Wona maande mahiinde nde hay gooto majjata.

R ramaani mo jurmeeje kuuɓtodini he mume.

A ko Allah mo ellaaji nginnaaki he mum.

M ko innde Nulaaɗo mo kala tago seedti ɗum.

T ko timminɗo kala gollal mum.

Hay yettoode lih ko limto e kijjanɗe mum.

Raamata Lih noddi fuɗnaange he hiirnaange.

O noddi rewo he wargo fof o wiyi ko dental woni doole men.

So diiwaan ina sokli baɗlal ngaddananen ngal .

So hare ñiibi he barooɗe lelli he koobi yoo jaran en ngal.

Raamata Lih, beelel busooɓe ko kaŋŋe lihdooɓe.

Raamata Lih, ñiikon kaŋŋe suddaare fina-janniiwo.

So ndunngu toɓii haa baade toɓii marmalle.

So ngaado fetti haa maamaaje mbiilti curwuɗi ñaantiima haa Kosam heewi.

Haa beeli ciiñci tule taatni.

Mi eero Raamata Lih, ciika haa nanndita he come.

Noddaa pullo gaynaako he demoowo.

Ciftinaaɓe dawrugol ko dawrande renndo he laddeeji.

Sifanaade en ɓamtaare ladde he renndooji.

Dawrugol ko aawde gollal soñande en ngal ɓamtaare.

Mahde duɗe janngirɗe hittinande en ganndal waasde en yeebaare.

Lunndaade en cokki he daamuuji hakkunde lewe galleeji.

Semmbinde en terɗe, he wuurtinde en ɓerɗe.

Raamata Lih rewii he lannda jiiduɓe fayndaare

Kuɗol Ngenndiyanke Joob