Yimre, tiitoonde: Debbo

Yimre, Debbo

So baaba ko teewu he ƴiiƴam, yumma ko muynam.

Debbo ko dariiɗo dadiiɗo ha tiiɗi gorko he nder galle koo lomtiiɗo.

Roondaade donngal teddungal he leydi feggoyaade.

Ko o dimndaaɗo tampere ɓesngu mo woytotaako.

Sahaaji piggal dookiraaɗo, monaaɗo kamƴaaɗo fotde mum ɗawaaɗo.

Kippiiɗo he barma nguleendi mo woytotaako.

Tampere cowagol liggey haɗaani mo golloyaade.

Lewbi sappo he balɗe ngaanummeere.

Sahaaji paɗe ko taƴɗe bokkoode loppitiiɗe.

Hoore ko yurbitiinde moorol ngam golle ko o jondiniiɗo.

Gorko oo ko kiisɗo he oo debbo o yurmotaako.

Pecce jamma ko o girñitiiɗo ngam ɓiɗɗo ko o muyninoyoowo.

Ñoolte ɓiɗɗo ko o muñoyoowo.

So baaba ko ƴiiƴam yumma ko woŋki he heeñere.

Yumma ko jurmotooɗo muñoowo.

Yumma ko gannduɗo fotde ɓiɗɗo jurmotooɗo.

Naange wulnge he corcortal ngam ɓiɗɗo yoo won he ngal daɗal kimmiroyoowo.

Holi baawɗo yoɓde yumma he ngal gollal ?

Ndefu ƴoogol guppol he dookde sukaaɓe he nayeeɓe.

He nder galle sahaaji ko o puraaɗo jawaaɗo kutaaɗo fotde ɗawaaɗo.

Juŋginiiɗo jurminiiɗo, ligginteeɗo mo fooftintaake.

Debbo galle, mo wonaa debbo jeere he gureeje.

Muñɗo ndee warñeende he suumtere golle he hiiɗeende.

Kolɗo aduna koltoyɗo janngo.

Tampuɗo aduna pooftoytooɗo janngo.

Muñnooɗo aduna joɓtaaɗo janngo.

Gorko mo hulaani hersaani debbo ngal geɗal o rokkaani.

O ñamminaani o yarnaani o holtinaani.

Walla o ñamnii o yarnii kono teddungal o rokkaani.

Kiisɗo kalifaandi mo yurmotaako.

Asmaan o hooynotaako, leydi he wertallo mum omo doƴƴo o ƴeewtotaako.

Ɓesngu makko o hettotaako o diisnotaako hay heen gooto o ɓattokintaako.

O yurmotaako ɓaawo o yeeƴotaako.

Fof ko ngam faaɗnude nguurndam maɓɓe haɗa ɓe wellitaare.

Gorko mo yurmotaako ɓaawo yeeƴotaako janngo miijtotaako.

Sabu tan ko o baaba ɓesngu o yurmotaako.

Mo yeewtikintaako ɓatikintaako hiiñnotaako.

Yumma ko joñaaɗo kiite koo pawaaɗo jaɓɓaaɗo kutaaɗo.

Yumma ko jurminiiɗo hakke mum ko kulɓiniiɗo.

Yumma ko giɗo mo waylotaako giɗli ɓoorotaako.

Yumma ko jurmotooɗo muñoowo kisal ɓesngu Geno koo torotooɗo.

Yoo Allah yoɓ njoɓdi moƴƴiri yummiraaɓe winndere ɓesngu yurmotooɓe.

Geno koo jurmotooɗo aadee mo yurmeende mum waylotaako.

Nulaaɗo koo jurmotooɗo moƴƴere to Geno koo torotooɗo ha kisen koo goniroyoowo.

Yurmeende ko wellitiinde to Geno he men ko nde teɓɓitiinde.

Goongɗuɓe fof ngolli fof janngo maa  ngontoy huunde fof.

Ñalnde Njeslaare 3 Mbooy

Htnd 2022 kuɗol Ngenndiyanke Joob

(Fr poissy)