Yimre, Tiitoonde: Aññeere

Nde naatmi ɗee genaale keɗiimi keɗtindiimi tawmi moni kala ina deeƴi e ndee yanaande.

Nawtumi laamu to Geno hay mi dillaani.

Ɓernde am boni gite am mberlii gonɗi.

Miijiimi miijtindiimi tawmi moni kala maa hoot e ndee yanaande.

Ndeke neɗɗo wonaani so wonaa nelaaɗo e ndee sahre dunaare.

Neɗɗo koo nelaaɗo ar nelal yontinan-ɓe.

Penaale e koongu nder renndo ngittanaaɓe.

Diine jeewte lugge njeewtanaaɓe.

Kaɗaaɓe penaale e nguykaaji.

Njoofonoɗaaɓe darngal woɗɗaani.

Ko en arɓe hootde en ngoɗɗaani.

Bolol ina fittaa ha laaɓi laakara en ngoɗɗaani.

Eɗen ɓadtii aññeere e mayre joorteede.

Tabitinen gondigal ngoppen lulindaare.

Yeengo e haawtaare, mawnikinaare fof ngonen e yeebaare.

Woto mo lunndii goonga wona e bolol halkaare.

Juuti kala aduna ko en woppooɓe.

Woto mo yejjiti yanaande sabu ndee sahre dunaare.

Nguurndam cellal fof to Geno kaa luɓaaɗo.

Jawdi aduna kaa luɓaaɗo.

Diine,

Woto mo yeebi ɗii waktuuji muddaaji mum dottaaɗi.

Sariyaaji ko keertinaaɗi.

Hajju asakal fof ko en farlinaaɓe.

Fof ko jamirooje Geno tawa en ngoppaani.

Maayde ko hulɓiniinde ko nde fittoore aduna ko nde momtoore.

Leydi ko nde taggoore naange ko nde ɓaaroore haa tiiɗa ko nde semmbinoore.

Yanaande ko tommbiinde ɓiyii Aadama ko nde tommbiinde.

Aduna kala ko juuti ko nde tommbiinde.

Ko e mayri tageɗaa ko e mayri nduttotoɗa.

Woto mo sikkii mawnikinaare e jawdi aduna ina haɗmaa e mayri ruttaade.

Ngal e ngel fof e mayri joorteede.

Jooɗɗo e coofɗo fof e mboɗeeri sakkeede.

Kulen Geno mbaɗten heen ndee aññeere.

Kulen Geno miskineeɓe en yurmaade.

Roofolɓe e alyatiima en yurmaade.

Alaa dimo alaa diimaajo fof e mayri ko en ruttittooɓe.

Kodden e ɓerɗe ngoppen luure moƴƴaani.

Alaa mo Geno teskii so wonaa ɓurɗo hulde mo ndewi pele moƴƴuɓe ngoppaani.

Nde mbirtiimi ɗee genaale hay gooto dillaani nganndu-mi ko goonga mo jilɓaani.

Kuɗol Ngenndiyanke Joob

Ñalnde dewo 30 Yarkomaa hitaande 2022