NGUURNDAM ALH TIJJAANI AAN

Ñaam-golluuje: Alh Abuu Sammbooru Barka, walla mbiyen mo Alh Tijjaani Aan. O saŋkii ko ñalnde hoyre-biir 14 lewru seeɗto hitaande 2001 caggal nde o wuuri duuɓi 46''.  Yumma makko wiyatee Alfaa Aali neene Jaara, ɓurɗo anndireede kummba Maaro leñaan. Baaba makko ko Sammbooru Barka woni innde mum, Alh Tijjaani Aan koo kodda jinnaaɓe makko kadi ko o Saajo nde tawnoo o rewi ko e funeeɓe ɗiɗo worɓe, Alasan e Alhuseyni.

Tijjaani Aan,

So laaɓii ko golle moƴƴe ngoni ndimaagu, ɓinngu moƴƴaagu ko cuɗaari tan. Ndeke fotde kala guurɗo ko gollaade, ko daranaade e dadanaade e feewnude sahaa mum. Ko daranaade e dadanaade e feewnude yonta mo hawri oo. Ko ɗuum waɗi so neɗɗo yontaama ina haani laaɓnditaade hoyre mum laaɓnde ɗiɗi:

1 somi waɗaani jooni, hol nde potmi waɗde?

2 miin potɗo waɗde oo, somi waɗaani holi baɗanoowo mi?

Ko ndeen yiyannde ŋarɗunde woni nde Alhajji Tijjaani Aan joginoo e nder nguurndam mum fof. O daɗɗi fayndaare, o waɗi heen fiɓnde, o yooɓii duwaaw, o ñaagii baɗlal Geno. Fiɓii aadi hakkunde makko e leñol, aadi mo sewaani saka taƴa, aadi wuɗaani saka buuña, aadi makko, haa ñalawma mo o aflinaa ñaamo makko. Haayre hoyre, woɗnde heedi koyɗe. O hirjini jaŋde e gollal, o noddi dental, o heewni ngootaagu leñol, o daranii ƴellitaare e pinal. O dadanii e ko aldaa e lohre ɓamtaare ɗemngal.

.  Jokkol nguurndam gorko pullo oo,

    Alh Tijjaani Aan (Gamaaji Sahre.

Ngenndiyankooɓe leñol am, yoo maayde Tijjaani Aan won sabaabu jiytondiral e diisnondiral hakkunde mon. Hajju Gamaaji payngu'', (ñalnde 14 lewru seeɗto hitaande 2002 hay gooto e mon woto ŋakku. Kawritee njooɗodo-ɗee lelnon tuugnorgal, ngal mbaydi e loowdi ngootiri, mbele ndokkon coɓoƴƴi e kuuɓal. Hoolaare ndee semmba, tawa nde wuɗata saka buuña. Jikke e hoolaare leñol fof fawaama e mon, yoo Allah won ballo.

Banndiraaɓe mbaynondirten ko e ndee yimre mbaɗnoɗen: e dow gorko mo Gamaaji, baban Faatimata Dikaajo, Kodda Sammbooru Barka, e Kodda neene Alfaa Aali Jaara.