Haala giɗli

Calminaali e jaabtawuuji

       Jeynaba Saam

1—Jam hiiri joom ŋari gila e cooynal? 

2-Yo a wuur tumaranke nootiiɗo nelal! 

3-Ko giɗli e korsa ngaddi-mi. 

4-Bissimilla tawɗo nuunɗal e pinal! 

5-Mbah panndinɗo goonga e kisal. 

6-Ii hol to giɗo Alla ummii e koyɗe garal? 

7-Mbaynii-mi hannde ko ɓernde jiɗal. 

8-Holi innde maa e sahre jeyal? 

9-Sahre am ko Gural!  innde am Ndoondi. 

10-Miin ne mbiyatee-mi ko Daado Arɗo Soh. 

11-Seydi Soh haayoo mi dañii denndaaɗo jiɗal. 

13-A jaɓɓaama koɗo belo gadduɗo ɓural. 

14-Ko giɗli e korsa ngaddi mi e cuɓal, giɗli am e maa ko goongɗuɗi tee wonaa  luɓal. 

15-Konngi maa ko belɗi juumtuɗi sanne! konngi kaŋŋe goobiraaɗi kaalis cemmbinɗi baɗal.  Bissimilla maa jooɗo mbela yeewtere

 ndee ɓura ŋarɗude. 

16-Seydi Soh kala moƴƴere aɗa jaɓi. Sibu ko a ƴoƴƴo pinɗo mo hakkille mum yuwtaaki e ganndal. 

17-Mi jooɗotaako so wonaaa mbertanaa mi leeso kaŋŋe ngo ɓorɗi kaalis. 

18-So a woppiino hono ngoon leeso galle baaba maa,  maa mi wertane hono maggo ɗoo? 

19-Ngoppu mi galle baaba am kay ko ngaari ɓuƴiri e hakkunde na'i. 

20-Ɗum ko lewru e koode dow kammu. 

21-Aan ne laana kaŋŋe awƴal kaalis so duñii hol to joofoyta? 

22-Hhhhh kaan laana kay banndi am en joofoyta ko tufnde yontaaɓe.  Jooni dey ma mi jooɗo sibu lahal yiytii mbeɗu mum. 

23-Miin noon ngar mi yiylaade ko aawdi ndi gabbe daneeje keele ɓutte. 

24-Wonaa noon haalde kecce ena fiytoo becce.  A tawii ɗoo mbeɗu kaŋŋe ndimu. 

25-Kono aan ne so tawii aɗa mahana mi huɓeere nebam? 

26-Huɓeere nebam mi jaɓi. Kono aan ne  yaataw dey aɗa sukkana mi cereeli naange? 

27-Aan kam hol no cereeli naange cukkortoo? 

28-aan ne mbaydi e hakkille maa hol no huɓeere nebam mahortoo banndiraaɓe? 

29-mi faamii ndeke ko a joom hakkille ceeɓɗo neho-neho mawɓe.

30-Konngol baaba

Jam hiiri e mon ɓikkon am? 

31-Yo a wuur cellaa jinnaaɗo tedduɗo! 

32-So goonga haala mon kaa ena waɗi fayiida sanne! koka nafoore mehre mehre. 

33-Ko Alla dey tagi giɗli o suuɗi e terɗe o feññina e gite. 

34-O waɗi yiɗde e yiɗeede,  O timminiri ɗum yeɗeede. 

35-Yo Alla yettinan on ndee faandaare o suɓoo heen moƴƴere

36-Ɓikkon am on njaaraama caggal nde Alla lonngini on ɗiiɗoo kannguɗi

37-baaba tinndol dey ko waaju sabu siftorde ko ɓennunoo.  Konnguɗi mon ko tiisɗi ko njooɓaari sukaaɓe janngo. 

38-Mo addaa e lewlewal noon wiyi yiyaani lewru,  maa fajiri feer naange fuɗa o loŋñita gite makko tawa o tinaani lewru fuɗii. A jaaraama baaba

39-Baaba a jaaraama sibu ko onon mawɓe mbiyannoo on ngonaa giƴum Alla kono on ɓooydii. 

40-Ko ɗum addi oɗon leloo njiyon taw minen sukaaɓe dariiɓe ɓee min njiyataa hay huunde. 

41-Ndeke mi laaɓaama a wonaa dewal jooɗoo diiñoo, leloo heewa leeso,  daroo koppi ndennda. 

42-A wonaa kadi dewel daɓɓel perlel, jooɗoo ferloo, daroo ferliɗa,  yaɓɓa ƴeɓa fergitoo filta. 

43-A jaaraama ɗum noon njokken golle.

Ittaa ko’e dudal demmba Aamadu bari leydi muritani.

Kudul Jeynaba Saam dewbo mo seeno Paalel.