Yimre, Duttugo

Dottugo

Aduna ko duusondiral moni kala e junngo jaggaani.

Ko gumɗo ɗowaaɗo hay njurbitiika yande o jommbaani.

Ardiiɓe dental ɗowngo peeje moƴƴe ɓe ƴettaani.

So ɓe ƴettii ɗeen peeje e dental ɓe ngaddaani.

Aduna addi ko baɗlal ngal famɗaani.

Ko haa ɓiyi Aadama rewa Geno ko famɗaani.

Geno koo goodnuɗo en e goodal ngal famɗaani.

Ko haa tinen ñiiɓen e tintinooje makko ɗe pamɗaani.

Ko ɗeen ndaɗndata e jeyli ɗi kulɗo Allah majjaani.

Baaba Aadama woni baaba tagooje ɗo annduɓe njeddaani.

Koongu e nder renndo baɗlal a addaani.

So a addii baɗlal e ngal dental min njiyaani.

Ngoppen luure e ɗee dente ɓamtaare ɗe ngaddaani.

Gardiiɗo yoo jaɓ heɗtaade ina jibina kawral famɗaani.

Biyɗo ina anndi fof ko majjuɗo fof mo hay huunde anndaani.

Gardiiɗo ko baawɗo tafde mo tafngo mum hay huunde nanndaani.

Ɓurɗo e ɓuraaɗo mo gardiiɗo teskaaki.

Gardiiɗo ko muñɗo mo bonɗo teskaaki.

Ciraa baa cirtaa baa kodde ndennda wowru njalta ceerta arsukaaji.

So maayde ko ɗeɗɗere maa wood ɓe maayaani.

So maayde ina ñiiɓi mahngo tuufeeje fajjaani.

Ngaree ndennden jam e bone ko aadi mo ɓolɗaani.

So peewal ardii ma ngaal dental ngal wuurat ko juuti ngal maayaani.

Dental ndewen e gardiiɗo mo peeje moƴƴe en luuraani.

Kuɗol ngenndiyanke Joob