Yimre, tiitoonde: Misra

Pullo ko perɗo misra e njiimaandi mum.

Koɗnooɗo e nder wertallo mum.

Jogiiɗo aadaaji e pine mum.

Tamnooɗo nay bey baali, pucci hanndortono jawdi mum.

Paarnoriiɗo pinal e nder jookli wertaango geno mum.

Caggal konuuji e njanguuji misra.

Ɓe peri ɓe pecciti ngenndi e saawoowo mum.

Ɓe kawri e annabi Muusaa woppini-ɓe ngaari kaŋŋe ngam ɓe ndewi e mum.

Haa Gana ngam ɓe njippini kaake ɓe ciñci ɗum.

Fof ko ngam jawdi e faggudu mum.

Pullo juumo mo juumaani anndude ndonaandi mum.

Konuuji safalɓe ngummii isra'iila ngam teettude kaanaŋkeeri ɓe ndonti ɗum.

Pullo juumaajo mo juumaani e anndude ngenndi mum.

Yooro egginiɓe gana ɓe njaaɓani sirnaayik e keccol mum.

Ɓooytaani konuuji aarabeeɓe pecciti keeri e caalli ngam hanndaade sirnaayiknaaɓe e jawɗeele mum.

Awkeer jaɓɓii pullo e laamu mum: Ja'oogo, manna, taaga, tonnjo, laamu termes, ha yottii laamu Seek Suleymaani Raasin Baal.

Satigi lumminii ha tiiɗi jattinii hanndi fuuta e maamaaje hisni ngenndi e gaggaaje mum.

Pullo juumo mo juumaani anndude wertallo mum, carɗo aawdi hisnani en ndi e pine mum..

Tooro, maasina, fuuta jalon, Adamawa fof fulɓe tammbii diine kisni carii ɗum.

Fulɓe ko jaambareeɓe suusɓe ɓe kulaani maayde.

Fulɓe ko joom'en gannde ɓe taaniraaɓe mum'en tamnoo pine e aadaaji.

Ceerno Seek Suleymaani Raasin Baal ballinooɗo kure e conndi ngam haɓde e añɓe fulɓe e sarde ɗum.

Fuuta fof piyane kaaci tuggude boode e nder fuuta alaa to o heddi fof piyane otti o salii njiimaandi woɗeeɓe e penaale mum'en.

O haɓi e jartodinnooɓe o itti muudo hormo e penaale mum.

O wiyi fuuta gooto fof ko dimo Allah e daande mum.

Yoo Allah yurmo yaafo Mammadu Sammba Joob ''Murtuɗo'' e golle mum.

O fiyaama ha noppi nguddi fof ko ngam haɓanaade leñol e ɓamtaare Pulaar mum.

E jime makko: dimo ala diimaajo woodaani.

Woni dimo tan ko daraniiɗo leñol mum.

Woni diimaajo tan ko janfiiɗo leñol mum yantoyi e leƴƴi goɗɗi.

Pullo ko juumaajo mo juumaani e anndude ngenndi mum.

Ñalnde naasaande 16 lewru korse htnd 2022 (poissy fr)

Kuɗol Ngenndiyanke Joob