Haaside

Haaside yiymi faliimi les lekki baddi weddiimi.

Piɓi e gaaraaji fof loŋiimi.

Haa tiiɗi les lekki baddi ndoŋkitiimi.

Kala to ndillirmi saɗtirimi.

Ɓe ndogi fuɗnaange e hirnaange ɓe kanndiimi.

Ndoganmi neene e baaba ɓe kajiimi.

Ɓe cikki ko fuunti ɓe palkisiimi.

Haaside haɗii kam ngenndi faddiimi.

Ɓamtaare am heedimi.

Fof e laabi faliimi haɗimi wonde e laawol faliimi.

Haaside loŋimi loŋkiimi gacce e nder leñol cañnjiimi.

Haaside añimi hay foofaandu ngañgu yottiimi.

Tumaaji e enɗam o faddiimi.

Allah koo mahiiɗo e nuunɗam koo cubiiɗo.

Allah koo mahiiɗo e nuunɗal koo kebiiɗo.

Fof goonga e fenaande seerndude koo kebiiɗo.

Ko nde hebiinde luttoore e aduna ko nde fittoore.

Haaside waajto hoyre maa sibu ñaawoore ko ɓadiinde.

Fenaande ko nde fittoore.

Goonga ko nde jaalɗinoore.

Haaside waajto hoyre maa e oo aduna ngustaa sañnjaare.

E diine ngustaa yeebaare.

Wileeɓe e piɓi tuutooɓe ngustaa yahndaade.

Miijo janngo ngoppaa haasidaagu mbele janngo ndaɗaa.

Sañnjano ngootaagu ngustaa piɓi e gaaraaji mbele ndaɗaa.

Ar juul e geno janngo ndaɗaa.

Dañal e baasal ko e neɗɗo feccaa.

Fof ko allah fecci woto huuƴƴu mbele janngo jeyngol laakara ndaɗaa.

Haaside e aduna ko o cuniiɗo.

Laakara ko o ɓiliiɗo jeyngol gila e aduna ko o cuɓiiɗo.

Wileeɓe e piɓi tuutooɓe ko o dariiɗo.

Yoo ɓee maay e baasal maɓɓe ko o jeliiɗo.

O yejjitii hasboore janngo ko o ɓiliiɗo.

Maayde ko luttoore e dow leeso ko nde sajjittoonde ha damal qabri ko nde fukkoore.

Bonɗi e moƴƴi ñalnde heen kaa kumpitteeɗo.

Kuɗol Ngenndiyanke Joob