Yimre: pulaar ko ɗemngal am

Pulaar ko ɗemngal am

Ko kanngal toŋtatmi e nder ngenndi am.

Haa ngal toowa ngal faloo añɓe maggal.

Pulaar soppani diine calɗi e tugaaje mum.

Hanndii caali ɓe mberti wudere wajiifa mum.

Konngol allah ɓe toowni ɓe kanndii diine e ɓure mum.

Ceerno suleymaani baal duuɓi e kitaale ina haɓa e bonɓe maggal

Haa baydi kaccee paam solɓiti daande abee sandee e keeferaagu mum.

Farayse e konu mum ndilli alaa to e heddii e ngenndi mum.

Suleymaani baal tini tintini konu mum.

Alaa ɗo heddii e ndee dillere mum.

Ɓe kanndii fuuta e semmbe mum.

Kono ñalnde heen ubbaaɓe keewi e nder gaññeeje mum.

Ko ɓee ndarii ngaawi pulaar e fuuta mum.

Caggal, ɓe lomtini jaambareeɓe ɓe kulaani maayde mum.

Sayku Umaar taal haa hannde pulaar e nder ɓesngu mum.

Aamadu Hampaate bah ha madiina gunaas ngam ɓamtaare pulaar e darnde mum.

Alh Muhammadu saydu bah ɓamti pulaar yaajni ha wonti ngesa eɗen coña e nder mum.

Fuuta hare maa e ɓamtaare pulaar amin nganndi ɗum.

Sibu ko jaambareeɓe yarlitinooɓe ngaawi ɗum.

Ceerno Jalaali winndi defte e paabi joɗƴini ɗum.

Abuu sih e Muhammed faliil sih mbinndi defte gannde toowɗe leñol njeeni ɗum.

Ɗemngal pulaar e ɓamtaare aɓe ndaranii ɗum.

Laamu kiitaangu e jaagorɗe mum mbaawa falaade ngal pularal e nder ngenndi mum.

Ngal daringal laŋ wiyi pulaar ina haɗa fotde mum.

Laamu mbileewu ɓooyngu waɗnoo ngal ciifondiral mum.

Siifondiraa jeeɗiɗi laawɗinaa e nder ngenndi mum.

Holmo darato firta ngal ciifondiral mum.

Fof ina laawɗinaa e ndee jappeere ngenndi mum.

Ngal powal daroo ina ŋaaka e nder renndo mum, pirten pulaar e doosɗe mum.

Ndarnen jor-jokkewal e pataraaje mum.

Mo wiyi ina halka pulaar min kalka ɗum.

Alaa ko jarantaa min so wonaa maayde min tekka min ndoondo ɗum.

Haa dummbirdu min ndummbee e mum.

Kasanka min kasbee e nder mum, e nder aññeere min e njollee e mum.

Fof ko pulaar hare ɓamtaare min ndaranoo ɗum.

Ruwannda e warngooji min njejjitaani ɗum.

Fof ko ngam leƴƴi moɗondiral pine e ɗemɗe waɗnoo ɗum.

Konaakiri senegaal gammbi muritani mali pulaar ɓamtaare ndaronoɗen ɗum.

Kala mo faali en daande codditen ɗum.

Mi wiyii en so en maayi en maayatata nguurndam ko ha seeɗa ha abada alaa e mum.

Teddinen maayde e ñalngu mum.

Ngam hasboore yeeso geno en njommbaani ɗum.

Kala mo bonni kalifaandi geno mum, janngo ñaawde sabu mum.

Allah yoo allah hanndo ngal am.

Hanndoo yaakoraaɓe ngal am.

So maayde am ina ɓamta ngal.

Mi jemmbitaani ha ñalnde asaraa'iilu arii e am.

Mi sujjana geno ngam daranaae ngal pularal am.

 Silaama mi hoccat so jihaadi mi fellat.

Añɓe maggal fof mi warat haa mi laato ƴiiwoonde ƴiiƴam ñalnde heen toɓat.

Fuɗnaange e hirnaange ɓulli ñalnde heen toɓo ɗi mbaamat.

Koli Teŋŋella maamaaje mbiltiino sabu darnde maa e fuuta min njiyi.

On njaaraama jaambaareɓe defte pulaar on mbinndii.

Kuɗol Ngenndiyanke Joob