Yimre tiitoonde: Rigaango

Haaside.

Haaside ɓuri bonde e mbarallu mum.

Ina jalan-ma tawa ina moofti ko waran-ma.

Saa dawrii golle ara ina fijan-ma ina jalan-ma tawa ina moofti ko waran-ma.

Haaside:

Ñohoowo penoowo bonɗi peŋtoowo.

Sahaaji fawmaa penaale ɗe a jibdinaaka.

Haaside ko jahoowo to wileeɓe piɓi tuutooɓe janfotooɓe doole jooɗtotooɓe.

Kala to njiyɗaa haaside yeeso mum ina suurka ina huɓɓ ɗa nde tawnoo fuɗɗiima duñtude doccotte jeynge mum laakara.

Koo kuɗaaɗo koo kiitaaɗo enɗam taƴoowo.

Bonɗo borooɗo booraaɗo janngo jeynge malkisaaɗo.

Won ɗanniiɓe ɓe tilfii.

Won jooɗiiɓe ɓe tilfii.

Wileeɓe piɓi tuutooɓe.

Ɓoccooɗe e toccooɗe ngam sa dañii yaa maay.

Haaside, mate a jibinaani ?

Haaside, mate a taannaani ?

Haaside, mate jeyngol jahannama a miijaaki.

Ɓe njehii genaale koye maayɓe piɓi e gaaraaji ɓe ngubbi.

Ɓe njanfiima kaari ɓiyi kaari.

Ina waawno so o dañiino o yurmoo on.

Ina waawno so o dañiino o walla on.

Ina waawno so o dañiino o faabo on.

Aduna ñiɓaaki ko ko ɓaari.

Ko Geno winndi alaa ko haaside waawi heen.

Welmaa mettumaa.

Kiitaaɗo taƴiiɗo moƴƴere.

Dawnooɓe ngam espaañ ɓe pelmiima.

Rewo e wargo ɓe piɓi e gaaraaji ɓe mbeddiima.

Saa artii ɗanngal a addaani hay arkaare ɓe njalmaa.

Saa ɗanniima hay batte a addaani ɓe njalkitma.

Ɓe ngara ɓe kofoo ɓe mbiyi maa mo dañaani hikka daña mo wuuri.

So ɓe njaltii ɓe mbiya so Geno jaɓii a ɓooyat a jaaƴaaki.

Ɓe tonngumaa ɓe kasnumaa e hoore yanaande a wontaa ɓos saka ɓosna.

Ɓe ndewii Allah kono annoraaji mbeeɓaani.

Sibu bakkatuuji keewi.

Yoo Allah huɗ laabidu o huɗa gollodiiɓe makko.

Yoo Allah huɗ haaside o huɗa gollodiiɓe maɓɓe.

Haaside ñawlu tan kono hiirat.

Haaside hiir tan kono weetat.

Haaside maa naange fuɗ.

Haaside maa naange mut.

Haaside maa en maay.

Haaside yeeso Allah janngo maa en kuccit.

Ɓe ndiwii jeeri ɓe ndoƴƴiima waalo.

Kono naange fuɗii yayniima.

Ɓe ndiwii waalo ɓe ndoƴƴiima jeeri.

Kono naange mutii.

Yoo Allah juul e koohoowo men Muhammadu o hisna-mo.

Yoo Allah semmbin nulaaɓe wattindiiɓe o hisnaɓe.

Yoo Allah hisnu ibraahiima e koreeji mum o hisna.

Yoo Allah ñaaw tooñooɓe o jinngana tooñaaɓe.

Sabu barke puɗal naange e mutal naange.

Aamiin