Yimre tiitoonde: Bojji maayɗo.

Bojji maayɗo

Bojji maayɗo ko leeɓte wonande maayɗo.

Ko huɗaaɓe to Geno wonande woyooɓe.

Saɗtuɓe tefngo wonande janngo.

Woyooɓe ina luuka ina pettoo ellee ɓe njejjitii janngo hasboore.

Janngo so en maayi holto kuccuɗen.

Yanaande tuufeeje falaande.

Leydi joortaande.

Mboɗeeri cakkiindi ɓaleeri pawiindi.

Ɓe njejjitii paaɗka moggaaka.

Paaɗka tuufeeje palaaka.

So dillere maayde yerɓinaani ma.

So pooccagol maayɗo dillinaani ma.

Miijtagol kaaɗeeki maayde semmbinaani ma.

So Allah neɗɗel aɗa suusi reedu.

Sehil maa e giɗo maa njehii mbele a hattaaki.

Janngo hasboore en luutetaake hay en njejjittaake.

Aɗa romminii dow lekki mberiiki aɗa faŋŋinii hay maayde aɗa tumminii.

So en maayi janngo eɗen njogii golle so moƴƴi ɓurii bonɗi aljanna fooftaade eɗen njettorii

So bonɗi ɓurii moƴƴi aljanna eɗen doŋkitii.

Yoo Allah yurmo yaafo Mammadu Sammba Joob Murtuɗo, aljanna Geno eɗen tororii.

Alh Abuu Sammbooru Barka, lollirɗo Alh Tijjaani Aan elleyiina Geno eɗen tororii.

So en maayi en cokliraani hasboore ngam en mbajtiima renndo e pittaali mum’en.

Saɗeende e ngaanummeren pittaali en njeertinii.

Maayde ko luttoore piɗal ko nde fertotoonde.

Nde jeertiniriima e jaŋde.

Nde findiniriima e puɗal naange e mutal mum.

Nde jeertiniriima e koyɗol nde jannginiima.

Duttondiral poofaali nde jannginiima.

To karaali rafi tinal nde jannginiima.

So en ndeentaaki so en maayi yeeso Geno kay koyeera en njommbaani.

En njannginaama hasboore kay woɗɗaani.

Maayde ko ɓadtiinde damal ko nde faddiinde.

Jaasirgal en ngonaa jaastiiɓe.

Maayde kayre cuɗoriimi wutte kayre ɓoorniimi.

Kasaŋka e hudusuru mbakkitiimi hay lootam ngam janngo njogitiimi.

Fukkaade to ɓadtii looteede to ɓadtii, aññeere mudeede to makka moggeede ina ɓadtii.

Geno toowi gannginorde e kidol woɗɗitii

Mbiɗa yima mbiɗa waajto.

Mbiɗa yima mbiɗa waajo.

Mbiɗa yima mbiɗa heɗee.

Mbiɗa yima mbiɗa ŋooɓe, kono anndu ko janngirde nde moni kala fotaani saɗtirde.

Ko janngirde tafoore konu maayde haɗoore sannjaare.

Ko janngirde tufanoore almuudo faandu njelaari kaɗoori joote e yeebaare.

Maayde ko kaŋŋe cuɗoroɗennde.

Kuɗol Ngenndiyanke Joob.