Yimre tiitoonde: Barke ngenndi

Yimre tiitoonde: ngenndi am

Ngenndi am.

Barke ngenndi ɓe ngaddii.

Katantaagal ɓe tekkii leñol ɓe ndoondi.

Jaambaraagal ko yiɗde ngenndi.

Addude baɗlal e nder ngenndi aawde tugaale e dartinde guurinooɗee.

Hanndaade barke ngenndi Sarande en ndi aawdi.

Jaambareeɓe wartinooɓe ngam ɓamtaare leydi ɓe ngaddii.

Ɓe nguurtini sariyaaji leydi.

Ɓe carɗi sariyaaji ceerndooji goonga e fenaande.

Ɓe tafi konu taccoowu leeɓol siraaɗi lummbinoowu ɓiɗɓe ngenndi.

Jaambareeɓe saabinooɓe potal colɓiti kiiɓal tonngiti potal.

Fuuta findiniraaɓe pinal ganndal e toowal.

Lelaade ha ngooƴam feccita kaanabbe ittaani yawaare.

Lelaade ha dorɗi ndoda kaɓɓaaba gila sallifanaa ha puɗal naange.

So annduɓe ciftoraama.

So ɓiɗɓe ngenndi kaalaama.

So leliiɓe e gaññeeje ngubbitaama.

Ngenndi ƴellito ha laabi ɓamtaare fertoo.

Jamanu ɓooyɗo ko en jaambareeɓe.

Jamanu ɓooyɗo kure e conndi ko en tamnooɓe.

Jamanu ɓooyɗo gannde toowɗe ko en janngunooɓe.

Jamanu ɓooyɗo barke ngenndi ko en hanndinooɓe.

Jamanu ɓooyɗo ko en tamondirnooɓe.

Jamanu hannde piɗɗiɗen dental pirtuɗen.

Jamanu hannde pinal ganndal toowal njannguɗen kono dental caltiɗen.

Kaaƴe kecce gannde binndanooɓe.

Jamanu ɓooyɗo binndirɗi kelanooɗi.

Jamanu hannde binndirɗi binndiraaɗi haa ndoŋkiti e daha cuuwtaaɗi.

Jamanu ɓooyɗo gannde toowɗe ko penngiɗnooɗe.

Jamanu hannde gannde toowɗe ko cariiɗe caakiiɗe.

Jaambaraagal reeni ngenndi addi ballal haa hisni ngenndi.

So en ndariima ɓiɗɓe ngenndi en puntaani.

So en ndariima jaŋde ɓiɗɓe ngenndi en kanndiima.

So en ndariima dummbirdu e dummbeede en kulaani.

So en ndariima maayde en kulaani kasaŋka en njemmbitaani jooni ɓamtaare ara tawa neeɓaani.

Maayde ko gootol so en maayi en maaytata.

Mdeen jaambareeɓe haŋki cuɗorinoo.

Ciilal afrik bannge hiirnaange faɓɓii ñalnde geƴƴelle tonngiraa.

Ŋoñotonoongal ŋoñaama haa tiiɗi e nder dummbirdu tiɗɗaama.

Afrik fof summbi sajii ñalnde geƴƴelle tonngireɗaa.