Giɗli FT-HK

Giɗli 

Faatimata Binta.

Tokara ɓiyii nulaaɗo mi yettat.

Giɗli ngonaa waawnere kono ɗi maa mi yettat.

Haa ɗi palii fuɗnaange ɗi peññini innde Jalaali mi tonngat.

Yiɗde tekki cuusal roondi.

Hanndii katantaagal fanndii.

Giɗli tiiɗi tiiɗtini miijooji.

Giɗli ngonaa ilooji kono kebbini caalli e cewle dartinooɗe.

Hawo hawjini-mi, haɗi-mi ɗaanaade.

Yiɗde wonaa ngelooba kono toowngo mum welaa waɗɗaade.

Giɗo dawnimi jeeri joftini mi waalo.

Miijo woɗɗi woɗɗi-dee yeweende.

Leliimi jamma ndoŋkumi ɗaanaade.

Gite am peerti ndoŋkumi yiyde.

Muɓɓumi gite ndoŋkumi ɗaanaade.

Miijo hooti hootdi e yeweende.

Hawo, foondu kaŋŋe  haɗtimi ɗaanaade.

Somi leliima jamma mi roŋka ɗaanaade.

Gite am mberloo gonɗi ngam miijaade.

Hee ma yummum giɗo.

Hee ma baaba mum giɗo.

Woto kaɗee foondu kaŋŋe e lekki juraade

Sippooɓe cippii kono pedane kuuɓaani.

Ñalnde lewru fooyni yaynii asmaan lewñi tiimti e koode.

Ndoogu lewñi lewñidi e giɗo.

Ha caafal saaftii saaftodii e giɗo.

Hawo lootimi fukkimi damal galle aljanna.

Mi tinaani ngirñitiimi tawmi komi maale malal.

No dañɗo giɗo mo giɗli mum mbaɗaa yeweende.

Mo ñiikon tafiraakon kaŋŋe ellee ƴiiwoonde ngatamaare.

Hawo foondu kaŋŋe.

So maayde mi feƴƴanat.

So dow kammu mi ŋabbanat.

So nder leydi mi naatanat.

So diisaare ɓoggi mi hawanat.

So kaaso e kasaŋke mi fellitanat.

Ha innde baaba jaraa'iilu e lewru mi winndat.

Mi ɓasoo koode tati mi jaŋtoo.

Baaba Aali innde mum dow lekki hawlaab mi winndat, haa mi seedto moƴƴere e ndimaagu ɗerewol mi tonngat.

Giɗli curimi curwini-mi jamma kaɗimi ɗaanaade.

Leliimi ha feccere jamma gite am ndoŋkiti ɗaanaade miijo hooti hootdi e yeweende.

GIƊO

Hawo foondu kaŋŋe

Wootere e giɗgol mi teeldanat.

Ɗiɗaɓiire: giɗgol mi hanndoo maale mum mi moɗto.

Tataɓiire:  diine e sunna nulaaɗo mi eewno.

Baade cooka mawɗi njonnge.

Jam naati yaltataa.

Mi hanndoo damal mi fecca ɓernde giɗo.

Giɗli mbeli pooli suukara njuumri e njuumaan.

Foondu kaŋŋe ƴetti junngo mum fawi e dow daande am.

Wiyi mi giɗo yoo Allah feewnu fala añɓe.

Giɗo am ƴoori daande gite am mberlii gonɗi.

Min ndokkondiri juuɗe giɗo moosi jaleeɗe.

Mbeltiimi njenanaami koyɗol wontii goonga.

Hawo lootimi, lootdimi giɗli e yurmende.

Yoo Allah ñiiɓnu gondigal faloo añɓe.

*Aamiin yaa barke abbere.*