Alh Muhammadu Saydu Bah

Ceerno Alh Muhammadu Saydu Bah.

Hannde mi etoo sifaade golle maa.

Hayso sifaade ina tiiɗi ɗo ganndal am heɓtata

Kono giɗli am e maa mi jaŋtoro ɗo mi huuɓnata.

Aduna e laakara manoore am mi fajjata.

Ko seydi Bah ha damal qabri mi neeɓnata.

Saɗeende e faaɗeende sabu maa mi anndata.

Ko laawol Seek Tijjaani ngaawɗa ko jalluɗi maggol e piindi laytiri konu mum reenooɓe tafɗa.

Kaa ñaamo nelaaɗo ɗo ñaame sahabaaɓe ndeen-maa.

Ko jamaanu go'aɓo peeñɗa.

Ko e jamaanu ɗiɗaɓo golle diine tiiɗɗe Geno ngolluɗa

Ko e jamaanu tataɓo cuuɗiindi juulɓe ngollanɗa.

Ko e jamaanu nayaɓo fergo e golle mum njaaɓanɗa.

Fuɗnaange e hiirnaange rewo e worgo yimɓe e jinneeji ndogi njaɓɓima.

Ceerno Hammee baaba duɗal e almuugal ndewɗa.

Ceerno Ahmadu Baro cuuɗiindi e golle mum tiiɗɗe ndewɗa.

Ha Madiina Seydi Alh Aali golle e sunna ndontuɗa.

Fof ndontuɗaa e nulaaɗo junngo tamɗa.

Ceerno ko ganndo no annduɓe diine ina teskimaa.

Ceerno ko jooɗiiɗo toowɗo ɗo dariiɗo junngo o heɓtata.

Ko o dariiɗo ɗo kaaɗtuɗe darnde miijo  en ngenndata.

Ko o kaalɗo mbirniindi ɗo annduɓe faamde ɗum weeɓata

Ko o kaalɗo mbirniindi ɗo majjuɓe faamde ɗum ɓe ngenndata.

Ñalnde batu daɗɗaa heefereeɓe peeje mum'en pirtuɗaa, diine e sunna nulaaɗo peññinɗaa.

Junngo maa nano, ko silaama nulaaɗo Allah njogitiɗaa.

Junngo maa ñaamo, ko kurus laawol sayku Tijjaani njooɓiɗaa.

Hannde mi jaara Allah ngam baɗɗo-mi almuudo maa.

Seydi Bah ha Madiina Gunaas wuro ciñcuɗaa.

Belaaɗo e mettaaɗo Madiina Gunaas ko wuro maa, siñcaango to Geno o rokkumaa.

Holko lunndii ndee moƴƴere nde Geno rokkumaa ; so wonaa malkisaaɗo ina yedda ɗo ɓiltaade janngo omo saɗtiraa.

Bahruu ha Madiina Gunaas ngenndi maa mbiccaandi pele nulaaɗo maa.

Pacaana e diiwaan mum ɓe keɗtiima simme e konnjam demal rewɓe ngam ɓe ngoppinaa, alaa ko heddii so wonaa ɓe ndewa pele maa.

Seydi Bah ha Madiina Gunaas wuro maa. Nulaaɗo siñci hoɗnumaa.

Kuɗol Ngenndiyanke Joob. Ñalnde aaɓnde 20 lewru bowte hit 2021 (poissy)