YIMRE: ƊEMƊE NGENNDIIJE

Ngenndiyanke Joob

Yimre:

Ɗemɗe ngenndiije:

Ɗemɗe caraaɗe caakitaaɗe hakke mmum ɗawaaɗe.

So laamu ko mbileewu nguu fooli laabidu e mbeleewu mum.

Laamu heedam-heedaagu mbarngu leƴƴi e ɗemɗiyankaagal mum.

Laamu cilal cilkitngal ciloowal ɗemɗe ngenndiije caroowu kaɗoowu fotdeeji aade'en.

Dammbitngu ɗemngal gootal, ngal wonaa nih hay ɗemngal ngenndiwal.

Laamu kiiɗngu ɗemɗe ngenndiije hay nih ɗanle laamuyankooje jaayndiyankooɓe won heen tawtortaake.

So ɗanle nder leydi min ciftortaake.

Bani fuɗnaange, boodi hirnaange ɗaɗol mum ine tiiɗi feggotaako.

Maayde ko gootol so en maayi abadan en maaytata.

Ɗemɗe ngenndiije caraaɗe caakaaɗe kaɗaaɗe fotde mum teppaaɗe, teppiraaɗe kinhinol ngelooba ina toowi tee ina fuuyi.

Deereral kiranngal, ngal alaa ɗaɗi tuugiiɗi e mbaydi ɓamtaare.

Ngal sañaaki hay nih celluka ngal hanndaaki.

Diiso-doosɗe holnde mbaɗton diisnondiral kawtinoowal nanondire enɗitirooje enɗe-leydiiwe ngadda nanondire tafiiɗe e mbaydi njaalɗundi.

Laamu diiso hoore am hooraagu, tabitinngu gootal mbari keddiiɗe.

Ɓerɗe amen ina cuma somin njiyi amin kula janngo mbaar mbayliigu waɗataa, waɗira no haaniraani.

So bawɗi tunngi kala golle tunngii maa deeɓe ndebbu e demmborde mum haa laato no goodal.

Haŋki ɓe karat, hannde ɓe kaalat.

So ɗoyli nanngii karaali haa ngooƴam fecciti hakkunde toni e suumko, so pinal weeti anndu kaa daɗaaɗo.

Seek Suleymaani Baal laatinooɗo salndu fuuta tooro.

Berlinooɗo gaccungol moɓbi boomooɓe.

Carnooɗo konuuli bonɓe feccunooɓe fuuta tooro kaɗi ɗum dental e nanondiral.

Tafnooɗo laamu potal artiri ndimaagu haɗi hiiɗeende.

Biyɗo dimo alaa diimaajo woodaani; woni dimo tan ko daraniiɗo ɓamtaare leñol mum.

Woni diimaajo tan ko janfiiɗo leñol mum yantoyi e leƴƴi goɗɗi wontoyi diimaajo mum'en.

So en pellitii ko Pulaar kaɓantoɗen.

Pelliten sileede e silkiteede.

So ngaandi hoyre en siiɓeede.

Woto njooɗoɗen mbiyen ɗemɗe men ko moɗaaɗe diŋkaaɗe sibu karaali jamma montaani humambinnaagal.

Alaa ko wari en so wonaa ɓeen sarɓe en aawdi mbiyi ndiyam toɓaani hay ƴiiwoonde feŋaani.

Ɓe kanndii sukaaɓe ngam ganndal ɓe njanngaani.

Toownata martaba leñol ko ɗemngal e pinal dammbita pine e aadaaji.

Ƴellitta leñol ko ganndal jannginde ɓesnguuji e hirande ngal sara ngal saakita ngal e kala nokkuuji.

Yarooɓe sanngaraaji e haako ɗaaynoowo ina njooɗi barakuuji ina njeddondira ko alaa malal.

Ɓeen kay pellaani jihaadi ngam boomaare leñol.

Ngoppen sanngaraaji e simmeeji bonɗi haako ɗaaynoowo kaɗa en neɗɗaagu.

Koccen kuɗi binndirɗi ndoganen duɗe janngirɗe njanngen ceerten e majjere e humambinnaagu.

Ina laaɓi majjere ko boomaare leñol.

Seerndi ganndo e majjuɗo kono niɓɓere waydi e leelewal

kuɗol Ngenndiyanke Joob

Rabat, Madiina Gunaas