Yimre: Ceerno Jalaali Diine BAH

Ceerno Jalaali Diine Bah
Ka ganndo jaajɗo Madiina ine hooli maa.
Pooye kuɓɓii jamma ɗo niɓɓe ngoodataa.
Gannde toowɗe ine tijjaa ɗo majjere woodataa.
Ɗaccuki falii e hakkunde kammu ɗo tinndooɓe majjataa.
Jaayre falii hakkunde kammu ɗo yahnooɓe jamaa paaytataa.
Jalaali ko jalbuɗo tiinde hay moosaali o fajjataa.
Pulaar jaŋde aɗa hirjini hay nguleendi naange a tinataa.
Ka lekki tamaroowi ceertuki ɓiɗɓe no min paamataa.
Annduɓe camma ñaama ɗo gaynoyde weeɓataa.
Majjuɓe camma ñaama ɗo gaynoyde weeɓataa
Waliyaaɓe cakkoo les makki hay ñaamde ine nduuɗoroo.
Ko lekki asko maama ma haŋki ina jaŋtino.
So diine hare mum kure aɗa yooɓoro.
Tuy-tuy yoo majjere suy aɗa semmbinoro.
Ko tijjaani baaba mbiyɗaa kono ko almudaagal nootiɗaa.
Seydi Bah woni yettoode ma.
Kono ko konngol Allah njaŋtiɗaa
Jumaaji e jamaaji nootiɗaa.
Alhajji Muhammadu Saydu Bah woni maama maa.
Kono ko ɗuum woni ko nduuɗiɗa.
Ko felo diine e sunna Muhammadu njooɓiɗaa.
Ceerno Jalaali Diine Bah.
Ka ilooji dogooji e nder maaje dartaade miijo en ngenndataa.
Ka karaaje fuɗo kuɗooli miijo en ngenndataa.
Ko karaaje ɗe geno acci e laddeeji hay jiyɗe en ngenndataa.
Ko karaaje lomtiiɗe kammu ɗo koode ciŋkiraa.
Hay ƴiiwoonde ngatamaare huɗo ɗe puɗataa.
Seydi Bah ka teelɗo e innde Jalaali ɗo annduɓe majjataa.
So annduɓe kaali majjuɓe ina kumpitaa.
Kaa ganndo moɓiiɗo ɗo ganndo ine teskimaa.
Ko ɗoon annduɓe fuuta njiyma kooli maa.
Ko Diine e sunna Muhammadu njooɓiɗaa.
Ko pulaar e gannde mum kaɓantoɗaa.
Ko ɓamtaare mum woni ko ndillantaa.
Ko ceerno Jalaali diine woni innde maa.
Ko seydi Bah woni yettoode maa.
Madiina gunaas woni wuro maa.

Kuɗol Ngenndiyanke Joob

Ñalnde 10 lewru siilo hitaande 2021