DEWREWE: RAABI SEYDI
Ñalnde hoyrebiir 2 Siilo htnd 2021
Walla Jirwiniyanke
Jirwiniyanke Ayaawo Habrirde PIINDI TV nde ngenndi senegaal; Raabi Seydi, yiy aduna ko wuro koldaa; huufngo gure keewɗe, ko wuro ngo ngannduɗaa fagguyankeewo, ko ngo tufnde ƴoogirɗe taariindi maggo, ko fulɓe ɓurngo teskeede e diiwanuuji dentuɗi e nder ngenndi senegaal. Raabi Seydi; ko o lekki njibinoowi mballitoowi renndo ɓamtaare. Ko o mbaroodi ndewri cirŋiniindi daraniindi ɓamtaare renndo. Jibineede mo koldaa ngam mawnugol makko ndakaaru ɗuum sabaaki waylaare makko e nder renndo makko.
RAABI SEYDI: Koo debbo dardaro mo sifortaake jom doole, mo hinere tokosere, jom yeeso yaajngo seeɗa, ko o debbo boɗeejo, (mo sifortaake ɓaleejo), jooɗɗo mooso, mo moosaali mum ŋakkata e kala sahaa. Ko o jom ñiiƴe cañondirɗe daneeje ellee kosam ɓiraɗam; RS koo ndaanan baawɗo ñaantungal, jiɗɗo PINAL Fulɓe keɓtinaaɗo e nder renndo mum, ko o debbo jiɗaaɗo, debbo mo gite laaɓtuɗe", (yumma suukara baaba njuumiri, ɓiɗɗo ndooy) “limmbam”. Raabi Seydi liggodii ma e jaayndiyankooɓe heewɓe daraniiɗe ɓamtaare ɗemngal Pulaar Fulfulde ngam haɓanaade ɓamtaare ɗemngal ngal e mbaydi kuuɓtodinndi", RS koo debbo tuugnorɗo to senngo yiɗde ngenndi mum e yiɗde diiwaan mum e ɗemngal mum, e haɓanaade renndo mum. Baaba makko wiyetee ko Alh Sitta Alh Usmaan Seydi, walla mbiyaa Raabi Sira Jaamanka; debbo mo Pakaaw Baalanta Kunndaa.
PINAL:
So tawii en ngartii to senngo pinal ngal: Fulɓe ngaabu ko fulɓe raneeɓe, tawateeɓe Koldaa e taariindi mum, kolli ñaañooji. Suusɓe, fulɓe yooɗɓe raneeɓe, Fulɓe aynaaɓe e remooɓe, joom'en ŋari. RAABI SEYDI koo debbo renndiyanke, cemmbuɗo e darnde ɓamtaare pulaar”. Hiirde pulaagu to Gammbi; hitaande 2019 ngam “FEDDE ƁAMTAARE PULAAR” nde woniino sabaabu potital makko toon e Babba saadu mo ngenndi Kameruun, wondudee naalaŋke ŋanaa hawwaa Pullo Gommbe, wondudee naalaŋkooɓe heewɓe, hono Ndonngo Daara (j) eknh. Ko ñalngu teskanoongu no feewi banndiraaɓe fulɓe afriknaaɓe heewɓe pottitiino toon e ndeen hiirde pulaagu". PULAAR: wiyi leydi payndi jibinta jallungol payngol, Raabi Seydi ko debbo dariiɗo darnde fattamlamre teskaande e ayaaawo Habrirde (RTF) ngenndiire to dowla Senegaal”, ngam e katantaagal Aali Malal Jallo gorko pullo gittuɗo yeeweende ngenndi senegaal e dentaangal taariindi mum, hay sinndo Raabi Seydi adaaki ɗoon wuppude wutte mum gadano e nder ayaaawo, eɗen mbaawi wiyde ko ɗoon wutteeji makko keewɗi njoori, ngam renndude noddaandu e gorko Pullo o Aali Malal Jallo e noddaandu pulaagu ndu o noddi ndu.
DEWEREWE: wiyde ine waɗa daartol debbo Pullo o wonaa ko newii, sibu ko o ndeɓam kaytoojam e tummbude maaje, ko o lekki ndariiki e nder ndiyam, ko o lekki ɓuuɓnooki ndiyam saatu nde ndeɓam ngulɗam hayti les lekkuule, ko o debbo afrikyanke lobbo daraniiɗo ɗemɗe ngenndiije wonaa tan ɗemngal pulaar Fulfulde. Ko o ɓokki puɗki takko jeeri njiimtuki e waalo, tiimtuki e renndoyankooɓe ɓaaƴatnooɓe ɓamtaare laaɓndotonoonde daneeje e tokkirɗi e fooɓre semmbunde e lorngo mum: lekki kii ko ɓokki, jeeri ndi ko weraango yaajngo waawngo tuddinde hatanteeɓe, waalo ngo ko nokkuure faddorde dente renndoyankooɓe daraniiɗe ɓamtaare pulaar. Eɗen nganndi ɓokki ko nafoore; gila to laalo ɓohe baaji eknh fof ko nafoore heeriinde. Ko noon RAABI SEYDI wayi e renndo mum; pulaagu ngu yettii Aali Malal Jallo, kono kadi RTF yettii Raabi Seydi sibu darnde makko e pulaagu ngu.
NJETTOOR KEERIIƊO: Wonaa tan giɗli am e ma mbinndirmi nde winndannde nde, ko ngam golle ma e renndo ma mbinndirmi ndee winndannde. Ngenndiyanke Joob mo cuuɗi men Rabat hoɗngo e diiwaan Madiina Gunaas yettiima njettoor keeriiɗo, mi yettii dentaangal jogorɗo tiimde e ndee winndannde ngam nde njettirten banndi men debbo Pullo o, en mbeltinirii dentaangal yiɗɓe pulaagu ngu teeŋtii e yiɗɓe Raabi Seydi.
Raabi Alh Satti Alh Usmaan Seydi.
Yo Allah juutnu nguurndam ɓeyda semmbe.
Kuɗol Ngenndiyanke Joob
Poissy France.
Ñalnde hoyrebiir 2 Siilo htnd 2021
Commentaires
Enregistrer un commentaire