Jimol pulaar Rabaat

Dental Rabaat

Welele welele haɗii en dental.

Nuɗɗiniiɓe e kenorɗe kaɗi pooye ƴellitaade.

Sikkuɓe ko ƴellitiiɓe hakkillaaji.

Tawii ko teppiiɓe e hakkillaaji.

Seɓɓitɓe e jinnde no kormbal

Ɓeen ko saliiɓe dental e ngotaagu maggal

Maaw maaw ɓamtataa ngal.

Jibinta ko koongu ɗuum seerndataa en e maggal.

Dental laaɓndii ko potal e nuunɗal.

Simmitaade e saɓɓitaade ɓamtaani ngal.

Won darinooɓe e moƴƴinde ngal

Won dariiɓe e toƴƴude ngal.

Won dariiɓe e sammitde ngal.

Won dariiɓe e saakitde ngal

Wurnata ngal ko newaare e yankinaare.

Aawata ngal ko kaaldigal e keɗondiral.

Sihnata ngal ko gollal haa ngal laato no darngal.

Nde keɗiimi keɗtindii mi.

Ndariimi ndartindii mi.

Keɗiimi keɗtindii mi tawmi ngal kosngal ittaani yawaare e maggal.

Miin kaaldat-mi ko e dental.

 Ngal luurdaani e beldal.

Min ndogda e ceene ganndal

 Min ƴoogana ngal dental.

Muddeende e faaɗeende kebbinaani ngal boyngal.

Ɗugginaade caggal batu hiiɗa jiyanɗe ƴellitaani ngal.

Tagaaɗo ko keɗɗel e kettel.

O tagtaa e kusel haa o wonti neɗɗel.

Eggo kolaaɗe ko miijo jeeri e waalo.

Mo heewaani mbaarudi woto hebbinat caggu e barmal.

So mbolu olii noddi ko baasal.

Bewre ndamndi lella ko mbaroodi ittata ɗum.

Mawɓe ndeeni ko juulirɗe e koɗorɗe.

Ɓe kaɗa lewe galleeji e bonɓe codorɗe.

Kala dental tintinaango ɓe ngadda baɗlal e miijooji.

Sukaaɓe rabatnaaɓe muɓɓitee gite.

Peerton hakkillaaji mon ñiiɓnon-ɗi e kawral.

Kala mo fooɗi cinndel maa les so wonaa e ɓural lunndo.

So wonaa ɗuum ine noddi boomaare e ngal dental.

Mbiɗa nodda dental.

Min caloo peccooru  maggal.

Kawral e nanondiral aadi min ñiiɓa e maggal.

Ndee yimre noddi ko dental.

Kala mo salii luutndii goɗɗe ine ngara caggal.

Ngal ɓalawal ellee ƴulmal lankingal e ngal damal.

Noddi faaɗeende e ciimti maggal.

Eehee ma ar nootomi e ngal dental.

Allah kulaa e maggal.

Uddit ɓernde maa e maggal

Ballal maa puccitaa e maggal.

Aan a wonaa dawri-leydiyanke.

Kono kaa dawri-baɗboniyanke.

Caamaaba ɗuggitiima e nder maayo ŋaakanii ngal.

Caloɗen caru ndoondoɗen.

Giye e kooce ñappen e maggal.

Sibu maayde mabba ko ɓamtaare men.

Kuɗol

Ngenndiyanke Joob

 Mo Rabaat hoɗngo e diiwaan

Madiina Gunaas.