Ciimtol golle "Saajo Maane"

Golle ɓuri haala, Saajo Maane innde makko naatti e daartiyankaagal ɓurɓe waawde fuku-koyngel ngenndi afrik. Ko adii eɗen naata e haalde nguurndam makko ngannden tawo duuɓi makko. Saajo Maane : o yiy aduna ko ñalnde mawnde 10 lewru seeɗto (nayaɓuru4) hitaande (1992), to Seeju. Kono wuro makko ngenndiiwo ko Bammbali, ko ngoon wuro mbootu makko daasa.

Caggal nde kaalɗen hitaande o yiy aduna, ko adii fof SM o tawaani jinnaaɓe makko ko fettiyankooɓe fuku. Sibu Baaba makko ko gardinooɗo juulirde Bammbali nde. Saajo Maane teskaama e makko jiygol makko aduna wonii kaawis mawɗo, sibu teskaa e makko ko yiɗde fuku, gila e puɗɗe-puɗɗe cukaagu makko ko o jiɗɗo fuku; kono jinnaaɓe makko ngonaano yiɗɓe o wona fettiyanke, sibu suudu maɓɓe ndu wonaa fettooɓe fuku. Hono kaaw makko ɓurnooɗo jogitaade nguurndam makko o, oon e hoyre mum ine haɗatnoomo fettoyde fuku saatu nde sukaaɓe njaltata waɗoyde fuku ekn.

  Saajo Maane adii fuɗɗude pettugol mum dowrowol koto ndakaaru e goomu pettoowu fuku mbiyeengu (FC génération foot). Caggal nde senegaal yahno daawal mum go'oɓal fuku winndere-yankeewu ɓe ndañi poolgu maɓɓe ngadanu hakkunde maɓɓe e leydi farayse, senegaal ɗekki farayse 1-0 ɓe ndañi toɓɓe tati, caggal ɗuum ɓe kawriti e danmark ɓe ɗekkondiri 3-3 sngl dañi toɓɓe nayi, caggal ɗuum ɓe kawri e leydi Ibraahiima Mowic sngl ɗekki Suyet ɗiɗ e gootel 2-1 ɓe njawti daawal maɓɓe nayaɓal hakkunde maɓɓe e turki, turki ɗekki senegaal 1-0 ɓe colɓitii ɓe caami e daawal nayaɓal. Eɗen njokka e daartol Saajo Maane : ɗuum ine jeyaa e ko addani SM yiɗde fuku-koyngel nde senegaal dañi poolgu mum ngadanu hakkunde mum e leydi Farayse. 

Caggal immaade mo (génération foot) to ndakaaru, o yaaɓani goomu mawngu fettoowu ngenndi makko ngu, ko e ɗuum o dañi fartaŋŋe teskeede haa Metz mo farayse hettinimo e htnd 2011-2012 haa e hitaande 2012-2014 o yaaɓani goomu Autriche), to (red Bull Salzbourg), htnd 2014-2016 (Southampton DC), caggal ɗuum o ummii ɗoon hitnd 2016 o fayi (Fc Liverpool) gila ndeen ko toon o woni e fettude; ha ñalnde mawbaare 7 siilo htnd 2020 o heɓi njeenaari makko (Meŋkelde teddungal afrik-yankeewal), ɓurɗo teskaneede mbaaw-ka fuku, wonnoo koto ngenndi Muhammed Salah”, calinooɗo tawtoreede nguun ñalngu teddungal ngal Saajo Maane jogori totteede, pulaar noon wiyi : pate-pate gonɗe e jaawngal ɗe ƴiiwoonde kammu ittata ɗum. 

Saajo Maane gila e nokkuuje dowrowje mawɗe o teskaama ko o baawɗo fuku, ko ɗuum saabi o suɓtanooma e fotnooɓe ƴettude Njeenaari winndere-yankeewu ngu; ñalnde Aaɓnde 2 lewru bowte 2019 to pari waala fenndo. Ngam ngañgu hakkunde boɗeejo e ɓaleejo ɓe ndokki ndeen Meŋkelde teddungal Liyonel messi (Lionel messi). Ko ñalnde mum o suɓaa nayaɓo ɓurɗo teskaneede ko golli e ndeen hitaande ekn. Haa ñalnde 7 lewru Siilo htnd 2020 to dowla Ejipti o suɓaa gadano nawɗo teddungal (Meŋkelde kaŋŋe afrik-yankoore). Yoo jogoro  jam, Geno newnana mo teddungal ɓurngal ngaal kanko e juulɓe kala (Aamiin). Kuɗol : Ngenndiyanke Joob)", mo cuuɗi men Rabat hoɗngo e diiwaan (Madiina Gunaas), wuro Alh Muhammadu Saydu Bah (Rta).

Ñiiɓirde men : Pulaarfulfulde78@gmail.com). 

Eɗen njetta Samiyel etoo e yiɗde mo hoyre makko.