Jimol koninke ngenndi

Ñalnde mawnde 1 lewru Jolal hitaande 2019

            NGENNDIYANKE JOOB

Usmaan Ndoom

Koninke ngenndi.
Nde ɓerɗe tunngi saawaawo majjeree maa.
Hakkillaaji tunngi mijooji fayde e maa.
Min lemii jeeri e waalo min njiyaani nanndo-maa.
Ka koninke laaɓtunooɗo e renndo maa.
Joginooɗo miijooji ɓamtaare ngenndi maa.
Koninke majjii min njiyaani lomto maa.
Yero yehii accii ciimti e renndo maa.
Yero yehii accii baɗte maa, baɗte mbaɗtinii e ndii ngenndi maa.
Nokkuuji duɗe pooye kaɗtima darnde maa.
Ciiñnooɗe ngolii e ŋakkere jiyɗe boli maa.
Weendu gonnjala wuddi ngam kattagol maa.
Weendu tuubaak mbooy wutti ili ndogii ngam kattagol maa.
Kala nde dille ndilli min cikka ko mbeelu maa.
Min nganndaa ko darnde yonti joɗnde suwaa e ɗii boli maa.
Ka jaambaaro mo hulataa.
Ka jaambaaro mo dogataa.
Ka martibinnooɗo e ndii ngenndi maa.
Momtannooɗo humambinnaagu e ndii ngenndi maa.
Yoo Geno feññin koode maa, feññina koode ɓurnaaɗe ngenndi maa, haa min laato sifotooɓe ɓure ɓurnaaɗe ngenndi maa.
Seede seediima siftinii golle maa.
Ka kaanɗo yetteede ngam darnde maa.
Ka jaambaare teskanooɗo e ndii ngenndi maa.
Barkeeje ngoli ɓoggi mum coli sibu ɓosaango maa.
Yoo Geno wumtin wumɓe haa paama ndee yimre maa.
Sibu kaa perannooɗo laabi ɓamtaare wuro maa.
Rabat e Madiina ndillii e ndee majjere maa.
Kaa suka tokosoo ngonnoɗaa.
Ka suka jiɗanooɗo ngonnoɗaa jiɗanooɗa e yonta maa.
Rabat fof woyii gite cim-cim e ndu yahdu maa.

Kuɗol Ngenndiyanke Joob.