Ogosugu-Mali

Ñalnde hoyrebiir 23 lewru mbooy hitaande 2019 njamndi 13: ñalawma.

                Ogosugu-Mali.
Ngenndiyanke Joob wiyi:
Kulol reedu haɗataa maayde.
Nde kure puccitii petti.

Eeraango e hartaango mawngo kokkitii ndotti.

Nganndumi añɓe ndañii sagooji mum'en.
Ɗoon tan wiyaa ɓe njanii e wuro fulɓe mawɓe nayeeɓe sukaaɓe kam e rewɓe sowiiɓe kuree e conndi ɓe cokki alaa ko haalete so wonaa ƴiƴameeje ɓe ndufii.

Añɓe cummbi cajii alaa koɓe nawi e balle so wonaa dogoo en mbaɗii bone mum'en ndogii.

Lemiimi fuɗɗaange e hiirnaange mi yiyaani sagataaɓe.

Njiymi ko sagataaɓe wontuɓe seemedɓe e mbeddaaji dariiɓe.

Cinndon koɓe wakkiiɓe konnguɗi mawɗi wukkutooɓe kono tawa golle e baɗle ɓe ngonaa woɗooɓe.

Leñol am. Leñol am.

Ogosagu wontii winnde ellee nde hay gooto hoɗaano!.

Naafigeeɓe cummbii cajii jam dañaama!.
Ibraahiima buubakar keyta kay-ne wallaani kalfinaaɗo leydi mo darnde mum timmaani.

So laamu makko ine walli ɓiɗɓe leydi kay-ne tinaani.

So nguurndam ine weli ne kay en tinaani sibu warngooji muusɗi en ceertaani.

Ardiiɓe nijeriyaa e ngenndi senegaal kay ne mballaani Gammbi tuɗɗii mbajjuuji ndee hare hay ballal ɓe ngaddaani, so mooleteeɓe ngontii dogeteeɓe warngooji kay ngasaani.

Tabital pulaagu hayso ine tabiti kay en tinaani.
Nelson manndelaa Tooma sankara patris lumbummba ɓe leliima e gaññeeje maɓɓe kono gacce ɓe naworaani.

Salinooɓe yawaare momti gonɗi ɓiɗɓe afriknaaɓe ɗo on koyaani.
Aamadu hampaate Bah wiyno yoo en ndentu tawa en ceertaani.

Jeewte moƴƴe coccoroɗen tawa golle ŋakkaani.
Ko en arɓe mehɓe hootooɓe tawa hay huunde en naworaani.

So dental noddii ne kay en nootaaki, so en nootiima ne kay fodde en ngollaani.
Holko haɗi en rentude tawa en ceertaani mbele janngo naften leñol men tawa en koyaani.

Dunaa ko jinnde nde jinnde mum jinndaani.
Mo jinndii e jinnde janngo o jinnda tawa hay gooto jinngaani.

Kuɗol Ngenndiyanke Joob
Mo Rabat Madiina Gunaas.