Hakkille bellitiiɗo

Ñalnde Aaɓnde joyi Jolal hitaande 2018
(5 novembre 2018) lundi.

Eɗen mbaɗa winndannde yowitiinde e gollal hoyre ɓurtunde, sibu hoyre ina haani gollaade ko waawi gila to miijo haa e to sifaaji goɗɗi” Sahaaji fooftinde hoyre nde mbele konde gollotoo ko ina haki ndo.

Reen miijo ma sibu ko ɗuum jogori wontoyde konngol ma, reen konngol ma sibu ko ɗuum jogori wontoyde haala ma”. Reen golle ma sibu ko ɗuum jogori wontoyde jikku ma. Reen jikku ma sibu ko ɗuum wontoyta mbaydi neɗɗaagal ma". Reen neɗɗaagal ma sibu ko ɗuum jogori timminoyde nguurndam ma.

Aade fof mahii ko e miijo, ko ɗuum woni fuɗɗoode aade, sibu ko miijo wontata konngol, konngol wonta golle; so golle ɗee moƴƴi anndu ko miijo ngo reen-no kisal golle ɗe”, tawde joomi men wiyi neɗɗo mahaa ko e anniya kala ko ngannoyiɗa ko ɗuum wona njoɓdi ma.

Paamen ngaandi hoyre aade ina golla jamma e ñalawma, ko ɗuum saabi woɗeeɓe ina mbiya aade fof yoo ɗaanoto ko ina tolnoo e njamndiiji 06h kala ko famɗi, so wonaa ɗuum ko ɓuri ɗoon; ko haa ngaandi ndi foofto, terɗe makko mbaawa tigi fooftaade no haanirta ni. Ɗoyngol ina ɓeyda cellal aade, ina usta ñabbuuli “Hay-sinndo won yoga e yimɓe ina ngannda ɗaanotaako jamma, ina saabo kala nde njiyɗa oon ko e ɗoyngol o woni e kala saha; ko ɓuri heen heewde oon neɗɗo heewaani ɓuttitde sibu terɗe makko ɗe pooftotaako no haanirta ni. Ko ɗuum saabi neɗɗo liggooɗo jamma e liggotooɗo ñalawma njiida cellal.

Neɗɗo yoo miijo mum moƴƴu sibu ko ngoon jogori feññinoyde konngol makko janngo, aade yoo konngol mum moƴƴu sibu ko ngool moƴƴinta gollal makko janngo. Sibu konngol ko ndiyam so rufii ɓoftotaako.

Neɗɗo ñaametaake yaretaake ƴiiƴam makko siiɓetaake, lahal hoyre makko ɓuucetaake, “ Neɗɗo ko golle e baɗle", so golle ɗe moƴƴi o yette, so golle ɗe mboni o ñiŋe. Neɗɗo feletaake sibu won ɗo pelataa aade so tawii ko giɗo ma jooni o añcuma, sibu neɗɗo fof yiɗaa feleede”. Ko ɗuum saabi sa felii bannde hay-so ko aan jogii goonga o etotoo ko ruttinde goonga o e makko ngam o etoo laɓɓinde hoyre makko. Njeewten nanondiren ngoppen pelondire, sibu pelondire so ɓooyi ko pellondire.

NGENNDIYANKE JOOB
RABAT. MADIINA GUNAAS