Yimre giɗli goonga

Giɗo am, ka tafanaaɗo cegeneeji kaŋŋe, kaŋŋe oo ko innde, dimo oo ko golle, bajjo e yontannde leñol, giɗo am ko aan woni kaŋŋe dimo, kaŋŋe oo ko innde, dimo oo ko golle. Dewbo juumo juumtuɗo hakkille, daɓɓo daande mo raɓɓiɗaani hakkille, ciforteeɗe dewbo kaŋŋe, kaŋŋe oo ko innde, dimo oo ko golle “So mi miijiima giɗo am tan gite am tan puccitoo gonɗi wala-lala wala-lala haa waalto e becce am dewbo juumo juumaajo ɓernde juumtuɗo konngi. Aan tan woni giɗo am, mo peccumi giɗli goonga e ɓernde am, ɓalel ngel ina ŋarɗi no kaŋŋe dimo, gite ɗee ina ndanwi no fedannde kosam, juuɗe ɗe ina keelɗi no ndiyam maayo. Somi miijiima giɗo’am mi miijo geɗe’am giɗo ko taawnuɗo mbaydi golle mum e haajuuji am, jiɗɗo giɗli goonga taawnoowo mbaydi am, kaaloowo kala e sahaa innde am. Giɗli goonga ngimmii koto allaahu joommen tabitinoowo ngootaagu giɗli men bellitoowo yiɗde men jaŋtotooɗo malal men, haa jaŋtoo nafooje giɗli men. Giɗo’am sahre nde ina weli kam kono mi wonaa keddotooɗo e mayre, noddanam ŋanaaji am tinndooɓe e siftooɓe am woto ŋakku ñalnde welnere am, so gaño am ɓattiima kam nduñaa o ɗokkoo e ɗacci baddi’am » so immitiima njarnenmo tooke mboddi am. Giɗo am kumpitiiɗo cofte am, jiɗɗo nguurndam am, somi wayrii yiyde giɗo am miijo hoota e giɗo am, gite mberloo gonɗi am wal-wal waaltoo e yeeso am haa mi nanda e sewnde iloore no ndunngu Geno am.