Kiite Afrik pawi en ɗum ko laamɓe men

🇨🇲 Pedle winndere, daraniiɗe hujjaaji ɓiɗɓe Aadama, ina poti weddaade konnguɗi mum'en ngam hartaade ɗee baɗaate e ɓee Laamɓe Afrik. So tawii ɓe ndenndaani Lannda ngoota e ɗee golle kaantorinɗe ! Follude ɓiɗɓe ngenndi e  ɓeto mum'en toowngo wonaa laawol. Neɗɗo fof ina jogii fotde hakkunde mum e ngenndi mum. Neɗɗo fof ina jogii fotde hakkunde mum e diiwaan mum. Neɗɗo fof ina jogii fotde hakkunde mum e falnde mum, ko noon ne kay neɗɗo fof ina jogii fotde hakkunde mum e nder galle mum. Neɗɗo fof teettantaake hakke mum, so wonaa ɗuum ina waawi jibinde pooɗe-nduure. Ko noon Njaay Saydu Aamadu wiyi: Neɗɗo waawa wonde ngenndiyanke tawa o waawa reentaade fotdeeji tati, e reende fotdeeji tati ɗii'', Reentaade ko jeyaa, feccondireede ko rennda, jaggude haa tiiɗa ko jeyi. Waɗde ɗawaaɗo fotde mum e ngenndi mum fof mettinat. 

Alaa ko teppi Afrik so wonaa Laamɓe Afrik, jooɗo fof wiya ummotaako, waɗta Gannginorde ndee galle baaba ! Ganndo wonaa gooto, pinɗo wonaa gooto hay ceniiɗo wonaa gooto. So en mbaylaani njuɓɓudi renndo men, Mi hulaani wiyde Afrik ɓamtotaako ha abada. 

Keɗto-ɗee kam, keɗtoroɗon kam hakkillaaji mon:

Kiite Afrik pawi en ɗum ko laamɓe men.

Laamɗo gujjo penoowo ko maale ñifgol ngenndi men.

So en tinnaaki ɓe kele koyɗe men.

Ɓe mbaɗtindoro warde pine men.

Leƴƴi cari caaki ngam laamɓe men.

Ƴiiƴameeje ndufi ngili ha njantoyi worgo men.

Mali gine picci juuɗe mum'en.

Burkina woyi woondu mawndu raaɓi nejeer e tooke laamɓe mum.

Ñawbu woppaani ha raaɓi Kameruun e filñitere mum.

Ko ɓee laamɓe saliiɓe kisal ngoni e ngenndi men.

Barke heewi e Afrik men.

Laamɓe huɗaaɓe hitaaɓe kaɗi ngoo waraango ila e Afrik men.

Somi miijiima o Afrik men.

Ɗee penaale e kiite koɗi e men.

Sabu laamɓe wuyɓe ngujji barke ngenndi men.

Borooɗe ngullii kono wonɓe paamaani e nder men.

Pool Mbiya polluɗo laamu Ciroowo cuɓtaaɗo ɓesngu ngenndi mum.

Sonkoo gadduɗo Sonko e nder ngenndi mum.

Dummbuya dummbuɗo folli annduɓe ngenndi mum.

Duuɓi 43 ardii ndii ngenndi e semmbeeji mum.

Holko Pool wayli e ndii ngenndi mum.

So wonaa pene e hoolkisaade hakkillaaji yahdiiɓe mum.

Tooma Sankara caŋkunooɗo penaale e nder ngenndi mum.

Amikaal Kabraal kabratnoongal jam e wertaango mum.

So come cirki cirkitii maa wood silɓe ɗum.

Tippondiral kesal ina dooki en, so wonaa ɗuum boomaare ina dooki en.

So barooɗe cippiri ha naati wuro wonko dooki en.

So ɗuum jeertinaani en melsiteede jiyɗe ina dooki en.

Yoo wuurtu Afrik ɓamto goonga jaalo jam arta e ndii ngenndi men. 

Kuɗol Ngenndiyanke Joob,

Ñalnde Aaɓnde 27 Jolal htnd 2025''.