Nguurndam, Alh Muhammadu Saydu Bah

              MADIINA GUNAAS

             Daartol alaa ko woppata 

E nguurndam Alh Muhammadu Saydu Bah RTA (weluya Geno yoo won e makko)

Kala ko nguurndam golli joomi mum daartane. Juutgol nguurndam ina battina e joom golle so tawi won ko o golli ko tiiɗi daartol woppata. Wiyde noon ina siimta golle o waliiyu Allah, ko njooram ngitaagu tan, kono wonaa joganaade ɗum ganndal e himme. Kono nde wonno almudaagal accata, nguun njooram ngitaagu ha oon almuudo wooda ko roɓindii e Ceerno mum. Ceerno Mawɗo gollani Allah ko haaldotaako, heƴaani tan e ɗemngal ko maa waɗte e kuɗol. Nde tawnoo kuɗol ina heewi ko naftata wonande renndo aroyoowo janngo ekn. (NJ)

Nguurndam C

Alh Muhammadu Saydu Bah:

Holi Ceerno Mawɗo 

Ndee hoodere Diine  jalbunde haa cay, suppitii ko to cikkite e nder reedu Fuuta, e hitaande 1900. Jinnaaɓe makko ko anndiraaɓe moƴƴere e peewal, ɓeen ngoni Ceerno Saydu Alfaa Bah jeyaaɗo Neere e nder Booseya. Neene makko Maama Hawlii Bah, ko ɗoon e cikkitte o jeyaa. Ceerno mawni ko e Ganngel nokku Seek Muusaa Kamara, ko ɗoon kadi o adii waɗde jaŋde makko Alquraana les-lesre, e Sariya, haa hitaande 1918 nde o yalti gadanol makko ngam ɗaɓɓoyde ganndal(ciftinen kadi ko ndeen Hitaande wuro Madiina Alhajji to Koldaa Sompaa) (siñcaa) kanko Ceerno o rewii e yoga e nokkuuji ngam ɗaɓɓude ganndal, haa o yottii Ngijilon to Ceerno Yero Baal Aan (Rta) nde oon wirnii jiyɗe yinɓe, o yawti to Ciloñ Duɗal Ceerno Hammee Baaba Talla (Rta) oon jogii e makko hoolaare timmunde haa resndi mo geɗe mum keewɗe, ko wayi no yeeyirdu mum ekn, ko C Hammee kadi adii rokkude mo laawol tijjaaniya, kadi ardini mo heen, ko ɗoon e Ciloñ o joofni ganndal ngal fuuta aadorinoo janngude.

Nde o ummii Ciloñ o ruttitii ko ngijilon, caggal mum o yehi Hoore Foonde, ko ɗoon o waɗi galle. Ko ɓaawo ɗum o waynii Ceerno Hammee Baaba Talla omo yaha to mawniiko C Umaar Tuure to Koldaa, hawri ko e hitaande 1927, (ciftinen ko e ndeen hitaande ceerno men Muhammadul Mansuur Ibnu Ahmadu Baro Rta yiyi aduna, weluya Geno yoo won e makko)'' ko ɗoon e Koldaa o yiyndiri laawol makko gadanol Ceerno Ahmadu Baro Rta, ɓe ngondi ko Allah haaji. Ko ndeen hitaande kadi o yiyndiri e laawol makko gadanol Ceerno Alh Aali Caam, tawii ina yaha Daakaa soɓɓulde, o tawtoranooma oon Daakaa, ko ɗoon o adii yiyde ngal Dental alliyaŋkeewal. Ko caggal ɗuum o yehi Madiina ngam salminoyde Ceerno Alh Aali Caam, ko oon sahaa o seedii sunna laaɓɗo cer, ko ɗoon o suɓii waynoyaade C Hammee to Fuuta, nde oon Yamirimo o ari, o wondinii oon jiyaaɗo Allah Ceerno Alh Aaali Caam, aɓe ngollaa Sunna laaɓɗo laɓɓinaaɗo, dewal Allah cemmbungal, ɓe ngondii ɗoon haa hitaande 1935 ko ndeen Ceerno makko o Alh Aali Caam fooftoyii. Ko adii yahdu oon tawi ko oon ɗaldiimo Dental ngal, kono caggal oon ko balɗe 40 o waɗi Madiina Alh Aali Caam, tawi feeñaniimo, o waawata heddaade ɗoon ndeen hitaande o ruumoyi ko Koldaa.

Hono no kala jiyaaɗo Allah jogorɗo waɗde ko tiiɗi kala nii, Ceerno Alh Muhammadu Saydu Bah heɓii jarabuyeeji muusɗi, kono ɗuum falaaki mo e ndeen fayndaare, nde Seerenɓe makko ngondinii e makko, o fiɓii fiɓnde makko tiiɗnde nde o fiɓtata. Nde o ummii Koldaa o rewii nokkuuji keewɗi, kanko e wondiiɓe makko, haa ɓe njottii to laamɗo ina wiyee Yero Jeynaba gonnooɗo oon sahaa to Teemanto, ko oon jaɓɓii ɓe kadi wellitiɓe e nokku hee, waɗdimo e gannduɗo ladde nde, ina wiyee Sammba Baalnde, oon ko Baañoowo, aɓe njiyloo haa ɓe njottii ɗo Madiina woni hannde ɗo, o faami ko ɗo Allah yamiri mo yo o hoɗ, ko ndeen ɓe coppi, ko e nder ndeen juulirde mawnde woni ɗo o waɗaa he nguu ñalngu (RTA), Ñalnde heen koɓe njeeɗiɗo ɓe ngonnoo; wonnoo ko ñalnde 4 taaske, ina hawri 27 lewru Colte hit 1936, ko ndeen o inniri wuro ngoo Madiina Tulmunawwara, o fawi ngo e dow deftere Allah e sunna Nulaaɗo Allah e laawol Seekana Ahmadu Tijjaani Sarif Rta, nduun eewnaandu ko nootiimo koo fof nootiimo ko e dow ɗuum. Hitaande 1941 ngooroodi Jumaa mawka kaa Madiina Gunaas diidaa; ngadana kaa wonnoo ko ɓakkere e huɗo e lekɗe haa 1955. Jumaa mawka hannde kaa aafaa ina hawruno 23 lewru siilo hit 1970. Ko jiidaa e Madiina Gunaas ceerno Muhammadu Saydu Bah sosii gure 65 lislaam, heen 51 ko e Senegaal 14 keddiiɗe ɗee ko hakkunde Muritani, Gine, Maali, Gammbi e Gine Bisaawo.

Njilluuji makko caggal leydi e nder leydi; hitaande 1944 ko to Gammbi o yahnoo njillu lislaam ngadiingu,1945 o yahii to Bajaar e nder Gine Bisaawo,1946 o yahii to Pakkaan,1946 o ruttii Fuuta ɗanngal juutngal hake lebbi (w) tati rewo e worgo hakkunde Cikkitte e Ganngel,1948 o ruttii Madiina Alhajji gadanol, caggal ciiñcugol makko Madiina Gunaas, omo yahdi e ceerno Ahmadu Baro, o juuroyiima Seek Ahmadu Tijjaani Sarif Rta Rta laabi jeetati(8)O hajjoyii laabi tati : 1941-1955 e 1973. Ko kanko sompi (fuɗɗi) ngal Pottital Alliyankeewal keeringal <-- Daakaa e 1942'' ndee luulnde alliyankoore ina jokki golle mum e gardagol kaliifa makko tedduɗo o hono ceerno men Alh Ahmadu Tijjaani Muhammadu Saydu Bah RTA. Ko nii ooɗoo jiyaaɗo Allah wuurdi e dow ndii leydi haa Ñalnde 26 Korse 1980 nde o fooftoyii, o acciri jokkol makko lobbol ngol, kaliifa makko Ceerno Alh Ahmadu Tijjaani Bah jokkuɗo ɗeen golle haa njottii ɗo njottii hannde ɗo. Yo Allah juutnu nguurndam kaliifa oo, yoɓa mo moƴƴere sabu barke Nulaaɗo Allah Muhammadu mo jam e kise ngoni e mum oo (Aamiin).

Ceerno Alh Muhammadu Saydu Alfaa Hammaat Bah RTA; yoo Allah yoɓtu mo moƴƴere hono nde o yoɓaano moƴƴinnooɓe gaay golle mum'en, haa yotti annabaaɓe, sibu seedaade en darnde makko e lislaam omo haandi e ndiin njoɓdi keeriindi, teeŋti jamaanu ngonɗen hannde oo. Aamiin 

Kuɗol Ɗaahaa Muusaa Bah

Juɓitinol Ngenndiyanke Joob e yir-yirde men Blogger google.