Yimre, Aamadu Bah dawriyanke SEN
Dawrugol leydi Senegaal.
Koolangel ƴakki aawdi.
Ɗowi en haa fonngo maayo suri en.
Tinndi sifti kono en paamaani.
Batuuji batuuji o haali kono en nantindaaki.
Cuɓtaaɗo koolaaɗo o resndi en.
Haa nder galleeji diine o nawani en.
O resndiɓe, konnguɗi moƴƴi ɓe njooɓnimo.
Halifaaɓe aada ɓadtiimo pinal he ɗemngal kalfinimo.
Holi ndee lunndaare firtannde en oo aadi.
O firtii ko o firnoo, firtii firtani en o firtii.
Ko o firnoo o firtii. Kono ko Geno firnoo firtaaki.
Maa min teɓɓito ko seɓɓitii.
Min lumminoo haa tiiɗa gaawe he silameeje min njooɓo.
Aamadu woɗɗaani ɓadti.
Galle laamu ko gaawe he silameeje min njooɓo.
Gaawe min ceɗta haa seeɓa min mbakkoo.
Silameeje min njarna haa mbeleendi siggoo.
Hitaande 2029 nder jolle min mberloo.
Kiwee kiwee dartinaani min.
Kiwee kiwee feccaani min.
Hay oo aadi fiɓnde fiɓtaani min.
So maayde ñalnde mum min nguurtat.
So ñawu ñalnde mum min cellat.
Peeje mon peccooje mon pecci on.
Ruttii ñawni ɓerɗe mon APR nder aññeere solɓitii mboɗeeri sakkii ɓaleeri fawii.
Keɗtoɗee no moƴƴi.
Keɗtoroɗee hakkillaaji mon no moƴƴi.
Ngabu waawi ndiyam, fay-fayru mum noddi puuyndam.
Gabi ɗii ŋaaki gaabi ɗi njaaji.
Joltirɗe ɗee nguddii.
Yarooɓe ɓee ɗomɗii.
Pucci ɗii kiji kijcindii.
Nay ɗii kuunu kuunti.
Gooleeje ɗe teeɗi teeɗti.
Kono wonɓe nantindaaki.
Makki wakki ɗee wakkitii.
Holko tagmaa firtude oo aadi?
Mo ngaandondirnoɗa he ɓesngu Senegaal.
Ruttii pirtuɗa piranɗaa mo pirannoɗa.
Ngardinɗa aan tan mo kooliɗa.
Nde tawnoo ko ɗuum ñaaginoɗa to Geno o rokkumaa.
Koongu he nder laamu ma min njenna.
Pine he aadaaji fof he nder leydi njoñaa.
Ngemmbuɗaa ɓe haa tiiɗi kopporeeje njeenɗaa.
Toŋtuɗaa ɓe haa tiiɗi mbiruuji mballuɗaa.
Nannguɗaa ƴiiƴam ma he nder ndoondi ngirñuɗaa.
Haa ɓe purɗi gacce njarnuɗaa.
Laamu ko Allah rokkata.
Dokkoowo dokke mum kuuɓata.
Sibu rekketeeɓe kuuɓata
Makki mahii masre masnoonde koongu he gacce.
A janfiima, kooce he kebbe he bolol a weddiima.
A asii ngaska haa luggiɗi APR a werliima.
Koolaaɗo amen golle mum min paami.
Ɓe paamni wondiiɓe mum.
Ruttii ɓe paamni yahdiiɓe mum.
Aamadu Bah, baade cooki fuɗnaange cooki hiirnaange.
Njarni jalluɗi nguurtini gaggaaje beeli he kolaaɗe.
Hecciɗini ruumanooji he kolaaɗe.
Eggini nay bey baali fof nduumi he kuɗooli.
Hitaande jeenaɓiire maa min ndoondo on haa dow min pukka on he leydi.
Min njarna on ngudduɗam he joltirɗe.
Ganndal pinal he ngardiigu kay o jogaaki.
Mate a yejjitii nguu koongu he ngardiigu ma, fof ko ngam solɓitde laamu he juuɗe ma.
Pulaagu fof darii wallitma.
Wiyi loppet lammitin-ma.
Aamadu Bah ko minen koolima.
Laamu ngu njiɗan-ma.
Yoo Geno juutnu nguurndam.
Tawna en tumaaji garoowo.
Min kocca gaawe he silameeje min njinngan-ma.
Fetelaaji min njogito.
He nder jolle piyane min pettina.
Aamadu naange ma ina huɓɓi yaynii.
Bah, baade ina cooki .
Fuɗnaange he hiirnaange fino Allah hecciɗini.
Bah, ballal Allah arii he nder ndii ngenndi.
Aamadu tammbii ɓamtaare Senegaal.
Makki ŋakkinii ndee fayndaare purƴinii.
Seydi Bah haa gannginorde tumaaji garooji min njoɗƴin-ma.
Yoo Allah jaajɗum to makko wallumaa.
Sabu Nulaaɗo ñalnde heen min toŋtumaa.
Kuɗol Ngenndiyanke Joob
Ñalnde Naasaande 29 lewru Mbooy 2024
Commentaires
Enregistrer un commentaire