Yimre, tiitoonde: Ndimaagu

Ndimaagu

Aduna hannde suri en surwini en.

Saliiɓe goonga ngam lunndaare.

Ƴeewde en ƴeewtaade en ɗee kuule.

Jamiraaɗe he kala ɓiyii Aadama laawɗinaaɗe.

Haayoo ɓinngel banndam rew jamirooje Geno cuɓaaɗe.

Poortingol he boli ngabboɗaa.

Goonga cuɓoɗa ñalnde kala wona jeewtidiiɗo maa.

Aduna hannde ko jawkal reena ndimaagu jeere nawaa.

Enɗam tonnga haa tiiɗi caggal galle werlaa.

Hoolaare sunii to galle maayde nawaa.

Maayde hobbi hoolaare he ndimaagu fof he nder cehe werlaa.

Ko en wuurɓe maayɓe, hayso ko en maayɓe wuurɓe.

Tumaraŋkaagal naati he galle maayɓe wuurɓe woni he waajaade.

Tumaraŋke ina haalda he guurɗo maayɗo.

Ɓe kaaldi kono ɓe ndoŋki nantondirde.

Ɓe noddi mawnikinaare yoo ar waajooɓe.

Ɓe ngoni he koongu, ɓooyaani cehe njoorndi woni he aabaade.

Wiyi yiɗi tan ko ɓee riŋkaade.

Ɓooyaani tuubaako ɓaleejo yotti ina ndaarta ɗo waali.

Haa yanti he galle majjere.

Boomaare ŋabbi dow lekki ina fadi kaaldigal.

Iiñcuru ɓeydii lumminaade.

Jam ndaarda hakkunde maɓɓe roŋkaa.

Ɓooytaani cehe mbiyi, luukaango jamma accirdtaake he gooto.

Cehe lumminii mbiyi ina pooɗa majjere.

Cehe ngari ina ndeppii.

Maayɗo guurɗo wiyi cehe yah padiraaɓe gooto gooto to damal gaññeeje.

Ɓooytaani boomaare sowtii dow lekki wiyi ngarmi he mon ko waajaade.

Kamɓe fof ɓe ngari aɓe ngajjii.

Mawnikinaare wiyi alaa ko waɗi nii so wonaa baɗlal am he maɓɓe mi addaani.

Ɓe ngoni tumaraŋkooɓe ɓe ngabbii bolol ngol moƴƴaani.

Mawnikinaare woni he halkude bone woppaani.

Guurɗo maayɗo woni he boomaare tawi faamde enndaani.

Boomaare ina neha sagataaɓe hay ba toɓɓaani.

So ɓe toɓɓii ne hay siiñ ñiiƴe ɓe mbaawaani.

Pulaar ɓe ngoni toobɓe hay firo ɓ ɓe paamaani.

Fof dey saabi ɗum ko waasde jaŋde ganndal woodaani.

Ndimaagu dey jeere mi nawaani sibu coodoowo ɗum he ndee jeere mi yiyaani.

Ndimaagu ko golle he moƴƴinde baɗle.

So golle moƴƴi njettooru haa abada.

So golle mbonii ñiŋooje haa abada.

Ndimaagu wonaa ƴiiƴam saka soomo hakkunde teewu he nguru.

Ndimaagu wonaa leñol saka siŋkee he ɗemngal.

Janngude Pulaar kay ina waɗɗii en.

Sibu tawreeta ko Pulaar jannguɓe kaalanii en.

Joom en pinal he faamu kollii en. 

Yowde hakkillaaji men he maggal.

Yowitaade en he maggal.

Yowtude ɓeen yowooɓe en he maggal ɗuum ina waɗɗii en he maggal.

Dewtorɗo men he maggal.

Ceerno Jalaali Diine Bah winndi defte.

Winnditii defte fof ko haa janngen tabiten he maggal.

Winndi ɓasooje kollitooje en he maande ɓamtaare maggal.

Anndu diine ma batuuji sunna kirjiniingal.

Madiina Gunaas howindiingal.

Fuɗnaange he hiirnaange fof duɗe kuɓɓii ngam jannginde ngal.

Dimo ko jannguɗo ngal janngini ngal.

Diimaajo ko janfiiɗo ngal.

Miin he Pulaar haa demal aññeere. 

Kuɗol Ngenndiyanke Joob

Ñalnde naasaande 9 lewru Jolal 2023

(Chanteloup FR)