Pulaar Fulfulde

Ñalnde mawbaare 9 lewru Seeɗto hitaande 2023

 ''waala Fenndoo''. » yiɗde ngenndi mum ko e neɗɗaagu jeyaa. Yiɗ ngenndi maa, njiɗaa yiɗɓe ngenndi maa, njiɗanaa yiɗɓe ngenndi maa. Janngu Pulaar njannginaa Pulaar.

Pulaar ko ɗemngal am.

Ko ngal paarnoriimi e nder ngenndi am.

Ko Pulaar e fuuta woni faaro am.

Fuuta jaloŋ fuuta maasina pulaar yonii-kam.

Adamaawa jaalɗini Fulfulde e coñce mum.

Mi arta fuuta tooro e kaanaŋkeeri mum.

Saydu Kan sifii ngoo maayo e keeri mum.

Ɓaari maayo haa yottii ngenndi mum.

O tafi aadee mbaydi e fergo mum, o tiiɗtini ngootaagu aadee e ngenndi mum.

Tekruur jaɓɓii fulɓe e ngenndi mum.

Jawoogo Mannaa taaga Termes haa yottii satigi e laamu mum.

Ceerno Suleymaani Raasin Baal

Ɓoorti wutte maccungaagu e nder fuuta mum.

Wiyi dimo alaa diimaajo woodaani.

Ndimaagu neɗɗo fawii tan ko e golle e moƴƴude baɗle.

O tafi konu ndoondiingu ƴiiƴam mboɗejam e ndanejam.

Mboɗejam ko ƴiiƴam ndimaagu.

Ndanejam ko ƴiiƴam aadi e enɗam.

Fof ko jaalɗinde ngootaagu aadee e nder ngenndi.

Piyane otti fuɗnaange e hirnaange ɗe kaaci hakkunde.

Jam ndaarta roŋkaa, ƴiiƴam mbeɗejam rufi mawɓe e sukaaɓe njuŋginii.

Nguru mboɗeewu lumminii tawii bone waawana.

Kan daasi molfal jaggondiri e ɓesngu deegol.

Piyane kaaci barooɗe ngirñitii ƴiiƴam rufi hakkunde sagataaɓe hulɓe gacce ɓe kulaani.

Federba lumminii tawii jam ala.

Abee sanndee dogani fulɓe e fuuta mum.

Baydi kaccee Paam sodditi daande liggi e ngenndi mum.

Fuuta iiñciti jam ndaarta roŋka.

Kayhayɗi piyane kaaci , koɓɓillo kanel sagataaɓe fulɓe ɓe kulaani maayde hulɓe gacce.

Wiyɓe maayde bonaani, wuurde bonaani ɓuri bonde haa maaya tawa accaani daartol.

Seeno-paalel seedtini ndee hare gasaani.

Fuuta fof girñitii wiyi ndee hare ndimaagu en puɗɗaaki.

Abdul-kaadiri kan ardinaa fuuta e njiimaandi mum.

Ko Pulaar njanngat-mi ko kanngal pinal mbinndiratmi.

Cuuɗi kurumaaji, galle ngenndiiwo, jaayndeeje, cuuɗi fitiram-golle.

Fof pulaar mbinndat-mi.

Mi woondi oon cañɗo kammu siŋkiri ɗum koode ilɓooje.

Oon bertuɗo leydi tagi tagooje gannde toowɗe Pulaar ina mooftii.

Maayde wonaa baasi lelaade e aññeere wonaa baasi hay waasde baasi jeyaa ko e baasi kono mi woondi Pulaar wonaa baasi.

Sayku Umar Taal fellii piyane hare diine haa wirnii ko Pulaar o tafiri nguu konu e peewal.

Fitirla diine ari yaɓɓi e felo Sayku Umar, yaynii ngal pooyal e dow pulaar o wertanaa ngal pooyal.

Waar jaabi Njaay kaale Pulaar kaale Pulaar haa haal pulaar yaynii e duunde fulɓe Pulaar fuɗnde fuɗoore.

Maa Allah firtu ko firii, o firta firooɓe ko firii.

Maa Allah firtu ko firii, firooɓe ko firii pirtoo ina piroo.

Maa Allah waɗ ko waɗnoo o waɗtoyoo koo waɗnoo tawa ko waɗnoo ina heddii e ko o waɗnoo.

Maa Allah heddo ɗoo heddinoo, ko heddinoo heddoo e waɗde ko waɗannoo.

Biyatenooɗo ina waɗa ko o waɗannoo waɗataa ko waɗannoo.

Maa o nattu waɗde ko o waɗannoo ko o waɗannoo heddoo e waɗde ko o waɗannoo.

Maa fenaande iw goonga heddoo.

Maa ko wonaa Allah iw goonga heddoo.

Maa ko wonaa iw Allah heddoo.

Maa Allah heddo ɗo o heddinoo, o heddoo e waɗde ko waɗannoo.

Maa naange iw ko wonaa naange heddoo.

Maa leydi tagge ko wonaa leydi heddoo.

Maa kammu firto ko wonaa kammu heddoo.

Maa penaale tuubakooɓe ngiw ko wonaa penaale maɓɓe keddoo.

Ko Pulaar kaalat-mi ko kanngal ñaaƴirat-mi

Ngenndi e ngenndiije ko kanngal paarnortoo-mi.

Tumaaji e enɗam ko kanngal njokkirat-mi.

Yoo Allah firtu pirtoowo ngal firta pirtoowo enɗam maggal.

Yoo Allah taƴ taƴoowo enɗam maggal.

Yoo Allah lunndo lunndiiɓe ngal.

Lunndoo lunndiiɓe seerenɓe maggal.

Yoo Allah teddin teddinɓe ngal.

Tdddina seerenɓe maɓɓe maggal.

Ko Pulaar kaalat-mi no Faatim Sammba Joob nii ñeemtinat-mi.

Kuɗol Ngenndiyanke Joob