Mbiɗa waajo

Mbiɗa waajo

Renndo seertungo kinɗe.

Kinɗe garnooɗe en tafde moƴƴina koɗdigal.

Hinnde ko joomaaɓe leñol ndenti tafi ngam yajtinirde gollal.

Winaani hay huunde so wonaa moƴƴirde renndo.

Mi limtan-maa ɗeen kinɗe jowitiiɗe e diine ɗe mbaylaani renndo.

Pullo, ko ganndiraaɗo ngaynaaka goornatnooɗo nayi pul-fuli ɗi ƴonngooji toowɗi.

Pullo mo tawe nebam e kosam kaaɗam mbayraani galle mum.

Tooroodo ko torotonooɗo Geno, o janngina ɓee so waktu yonti o hirjina juulɓe fayde e mbajjiri.

Bammbaaɗo ko bambuɗo hoɗdu hoɗa siftina iwdi taaniraaɓe, askina dewol e gorol haa njiytondira.

Labbo ko lawotooɗo penndirɗe e ɓirduɗe wostondira e pullo gaynaako.

Baylo ko bayloowo kaŋŋe e kaalis siŋka debbo pullo haa yooɗa nannda e uurul-ayni mum.

Maabo ko maabotooɗo saña gude e kosiije siŋka yontaaɓe leñol mum.

Maccuɓe ko jaɓɓe kalifaandi Geno mum, haa peri laabi ɗoftii seerenɓe mum 

Jaawanɓe ko askinooɓe peŋa peŋɗe tiiɗɗe hakkunde hoɗdiiɓe tawa ceertata.

Sarifaaɓe ko taaniraabe Nulaaɗo Allah mo jam e kise ngonii e mum.

Subalɓe ko waawɓe ndiyam ɓe awo cide e koɗɗaali ngaannaani ɗum.

Sakkeeɓe ko sakkooɓe ina ɗata paɗe jooɗɗe ina njooɗna leñol mum'en.

Seerndiɓe tan ko mecce moni kala ina daranii ina adda baɗlal mum.

Fof ina tawee e tuubakooɓe alaa ko ŋakki e mum, haɗaani dental e jiidigal maɓɓe.

Enen fof poti to Geno alaa ko ɓurondirɗe.

Mo yeddii yoo ƴeew annabi Aadama e tago mum.

Juulɓe e heefereeɓe fof njalti e mum.

Enen fof ndenti poti to Geno alaa ko yeddi ɗum so wonaa mo mbon-nehdaagu ina jaali e mum.

Ɓurduɗen tan ko to dewal Geno mo rewi mo ha maayi fuuntaani hoyre mum.

Ndesondiren mbele ƴiiƴameeje men ndenta njurum jaalo e men.

Kosam faloo hanndo añɓe mbaasa yottaade en.

Kuɗol Ngenndiyanke Joob

Ñalnde njeslaare 8 korse htnd 2022