Tiitoonde: Ngaandi

Tiitoonde: Ngaandi.

Koɗogol yeeweende e ngaandi.

Ko guddugol e geddugol jokkondiral ngaandi e laytiri hakkille mum.

So koɗogol yeeweende e ngaandi juuti jibina ngaanumma.

Jokkondiral terɗe e laylaytiri ƴiiƴam e ndiyam njas-njasina ngoobo e hakkille.

Ko noon dewerewal ngal luubo terɗe ha ɗe ngannomina e jaasre guurgol ɓernde.

Aadee fof ko adan waɗtindii no garal ha feeñi e maggal.

So peeñdi feeñdi e ha timmii e ngal dunal.

Nduumoɗen e gollanaade renndo e leñol.

Nduumoɗen e yarirde aynaaɓe ɓennuɓe sañnjantonooɓe ngootaagu e ñiiɓnude ɗemngal e sarande en ngal aawdi.

Kirondiral e kiwondiral ɓamtaani en e maggal.

So ngaandi ñolii ndiin kay bonii.

Woto njedden ganndo ganndal e maggal caroowo.

Kiilnanoɗen annduɓe e maggal ganndal sarooɓe.

Ganndo ganndinoowo aawdi moƴƴiri e men gaddoowo.

Ngoppen koonguuji majjere e boomaare.

So ganndal leñol njanngen.

So pinal leñol ñiiɓnen 

So jimɗi jimeteeɗi pinal alɗina.

So jaŋde janngeteende ganndal anndina.

Mooraade jubbol firaani ngol sañcetaake.

Wiyaani leñol leñol sabu ƴiiƴam.

Wiyi leñol leñol ko sabu ɗemngal e pinal.

Ngel e ngal haɗii en ɓamtaade, so ɗuum wonnoo ganndal e pinal e toowal en ndaɗetaake.

Hayso en ndaɗii e boli mawɗi en taccaani.

Duumaade e nguurndam haɗataama maayde.

Ndoganen maayo so cidal cilen ngal cilkiten ngal ngaandi hoore maggal ndenten ɓuucoɗen ngal.

So keele ngaandi pinal ganndal toowal en ceerti ɗo martaba leñol en ceeri.

Leñol ko pinal ganndal toowal e ɓamtaare, so ɗum ñiiɓi barke ngenndi en kooliima.

So alɗuɓe ndummbaama jaale njuŋginiina 

Winndiyankooɓe so kuɗi kelii binndirɗi cariima caakiima.

So sagataaɓe taccitii maaje nayeeɓe njuŋginiina.

Seemedɓe cañciima, boombi tafii konu halkaare.

Ɗo nehdi ŋakkaa kono yillaaki jooɗiiɓe. 

Njanngen njannginen ndeentoroɗen ɗii konuuji.

Kuɗol Ngenndiyanke Joob

Rabat Madiina Gunaas