HAASIDE

HAASIDE:

Moggintooɓe sirluuji tewnotooɓe.

Kala moƴƴi paggittooɓe e nder renndo yuppooɓe.

Galle sarooɓe saakooɓe, naange feccooɓe.

Baɗe ubbooɓe e damuɗe galleeji asooɓe.

Rewindiiɓe pele ɗanniiɓe kala koɓe ndañi e jawdi yoo taay e mayri yo ɓe ɗaay.

So teddeendi galle fawaaɓe ha teddi rimndaaɓe.

Won heen ɗanniiɓe sabu dabare ko ɗaaniiɓe.

Won heen jogiiɓe golle mbaɗtii ngaameela sibu dabare ndammbaade e nder terɗe.

Ɓee heen ko gollooɓe juuɗe bonnaaɗe hay yeñcinde e nder booñ ɗe nattii saɗeede.

Sagataaɓe carii caaki naati e laddeeji ngam dogde baasal e nder galleeji.

Heddiiɓe ndogi ndogani wileeɓe ngam yoo sagataaɓe keddo e nder maaje.

Ɗaɗi taƴaa, ɓee heen ko baralli nelaa.

Penteraŋkooɓe peŋti musiiba naattini e nder galleeji.

Lunndiiɓe siraaɗi naati e bidaaji.

Ko ɓeen ndenndi fedde e nasaara kawriti e yahuuda pelli piyanɗe jihaadi majjere, lomtii boomaare.

Aɓe calii, koye aɓe tiiɗi !

Luttunooɓe duuɓi e kitaale, hay ɓesngu nattii tiitoonde waytiino fiifoonde.

So aduna ko kaaƴe won heen ngurjii

So aduna ko baaɗe won heen maayti.

Ine ñirɓinii kono janngo ñaawoore ine hulɓinii.

Penteraŋkooɓe, ko ƴakkooɓe teewu siiɓotooɓe ƴiiƴam.

So penoowo ko bonɗo, haaside ko ñolɗo.

Won heen ɗannii ndoŋki hootde ngam piɓi e gaaraaji e koye maayɓe.

Won heen ɗannii ndoŋki dañde ngam guurte baasal.

So mbaroodi hirsaama huttaama teewu mum ñaamaama !

So teewu mum ñaamaama ƴiye mum ŋolaama.

So ƴiye mum ŋolaama ngaandi mum ɓuucaama.

Ɗoo ko mallol gaynaako, jommbaani agaaɓe nooto.

So giɗo laattiima sehil, mi ŋabba e dow waande mi hiwa njabbaandi.

So sehil sakkii ma, mi hocca fetel mi waɗa piyanɗe tuy tuy.

Ha haacaango wulla nannda e rigaango !

Ko wuttooɓe kine ine ƴeewa ngufƴam, wuufa afrik wukkitoya farayse.

Powal ine waawi dogdu kono haalanta mbaroodi.

Tiree tirtee ko jom bamngel tirnoo.

So aduna ko laɓi maa wood ɓe yuwi.

So aduna ko jammbere maa wood ɓe soppi.

Galleeji njeewi ngam ŋakkere sagataaɓe.

Galleeji njeewi ngam ŋakkere seemedɓe.

Fof ko ngam mojobe sanndalleeɓe.

Fof ko riiwtude moƴƴere ngam sarde en aawdi. 

Giɗo ñukkindiiɗo sirlu nantuɗaa mo boowal.

Sehil ñukkiindiiɗo sirlu nantuɗaa mo boowal.

Haaside peññinɗo ngañgu ɓurani-mi.

So tabalde dilli ha bawɗi tunngi mi reento.

Sehil ine saɗti giɗo weɓaani.

Holko woni giɗli ?

Mbele ko jeewte bagge jaleeɗe e kelle ine tappondira.

Holko woni cehilaagal ?

Koɗol Ngenndiyanke Joob