Hiraande ko ñalawma fewjete

Ñalnde Aaɓnde 26 lewru Yarkomaa hitaande 2020

Hiraande ko jamma ñaamete kono ko ñalawma nde fewjete ! Mbele ngu ñalngu ngonngu hannde Gine mbele aɓe tijjinoongu ? Mbele ngu ñalngu alaa mo ngu jommbi ? Mbele sa leliima jamma aɗa miijo mbele alaa ko jolata he ɓernde ma ? Holi peeje ƴettuɗa ɗe kanndortoɗa nguurndam ma ? Tawde pulaar wiyi ko maa feere bona nde feere moƴƴa. Ɗe peeje ciŋkorinoɗa mbele ɗe caŋkaani ma ? Holi darnde ma he ngal dingiral ɓoccolal, ngal ngannduɗaa a suwaa tawo naatde kono ina waawi ngal wona mojaare ma janngo ! Tesko aduna tagaa he mum ko geɗe ɗiɗ-ɗiɗiije kannje fof aɗa haani tijjaade ɗe he nder nguurndam ma sibu ɗe njombaani ma". 

Nguurndam he maayde

Ñawu he cellal

Dañal he baasal

Jiyɗe he ngumndam

Tesko ɗee geɗe fof alaa heen ko jommbuma he nder nguurndam ma. Kala heen gootal aɗa haani ɗum heblanaade; sibu Ceerno Muhammdul Mansuur Ibnu Ahmadu Baro RTA yo yurmeende Allah won he makko (aamiin), o wiyi: neɗɗo fof ina haani heblanaade janngo mum. Tawde a daɗaani maayde, sa maayi maa yiy ko ngollunoɗa. So neɗɗo jibinaama dañii tolno duuɓi mum sappo ekn (10) omo haani yeñcinde ko ina nafta mo janngo. O dañnoo ko cellal, sahaa arii o waasi ngal o wontii ɓolo ngam o adorinoo ko cellal, walla nih mbiyen o adorinoo ko cukaagu o waasi ngu o dañii duuɓi kellifuya ngam won tolno mo o tolnoto ko wonata ko he duƴƴal kortagol omo waawi waasde ko heewi he nder nguurndam makko. So yehii ha o roŋkitii wonko o waawno p roŋkitii ɗum wiyee o nawyi, peral nayeewu yanii he makko. 

DAÑAL:

Dañal ina yaaji; ko helmere waawnde huutoreede he kala fannu: cellal ko dañal jawdi ko dañal, ganndal ko dañal ɓesngu ko dañal. Kono sa teskiima ngal ɗoo dañal ko dañal jawdi, jawdi noon ine dañoo ine waaso. Ko waɗi pulaar wiyi dañal araani duumaade. Aɗa waawi dañde ko adii maayde ma mbaasa. Aɗa waawi kadi dañde ha maaya, kono hay ngaal dañal sa maayi tan anndu a wonyii baasɗo, sibu jawdi alaa ko nafata maayɗo to laakara. Ngaal dañal nafatnomaa tan ko aduna hanti a yaltii aduna a naati he galle goɗɗo mo a annda a anndanaa. Waɗde ndiin jawdi nafatnomaa ko aduna ngam mbaɗiraa he mayri Allah, naftaandi juulɓe he ɓiɗɓe Aadama (ASW). 

Jiyɗe:

Jiyɗe teskinta ko neɗɗo o arii he timmoode nguurndam. Neɗɗo so yehii ha o nattii yiyde oon jotondirii he fedde timminɓe pele nguurndam. Wonaa wumde woni maayde kono ine anndaa so tawii neɗɗo yottiima he ndiin mbaydi tawde ko nayeewu hanti o ɓadiima ndeen fedde timminɓe pele nguurndam. Sa nanii jiyɗe firti: ko neɗɗo ine yiyatno nattii yiyde haŋkadi o wumii melow o nattii yiyde. Holi nguurndam neɗɗo he nder renndo mum; neɗɗo fof ine haani laaɓnditaade ngal laaɓndal hoyre mum sibu ko laaɓndal jarngal laaɓnditaade hoyre mum he nder nguurndam mum. Nde tawnoo neɗɗo tagraaga tan ñaamde he yarde. Neɗɗo tagraa ko gollaade he gollanaade renndo mum.

Kuɗol Ngenndiyanke Joob