GIƊGOL TIMMUNGOL

Ñalnde Naasaande 29 Yarkomaa hitaande 2020

Tesko ngel binndanngel keeringel; hakkunde ɓe yimɓe jotondirooɓe he mbaydi golle keeriiɗe, hay sinndo golle ɗe peeñata ko he jotondiral maɓɓe keeringal. 

Giɗo nokkata ko he gerngal. Gaño nokkata ko he seytol. Jiɗoowo nokkata ko he noɗol. Jiɗeteeɗo nokkante, kañum nokkata hay he gerngal gootal. Njokken tawde janngoowo o fuɗɗii ma roɓindaade he ngel binndanngel tokosel keeringel. 

HAKKUNDE JIƊOOWO HE JIƊETEEƊO:

Jiɗoowo he jiɗeteeɗo holi nafooje hakkunde maɓɓe ? Jiɗeteeɗo alaa hujja he waawnude jiɗoowo ɗum o. Nde tawno kanko ko o teelɗo he giɗgol. Kadi ko o teelɗo he gañgol. Sa yiɗii neɗɗo ine woodi ko nafatu-ma, ko hono noon sa añii neɗɗo kadi ine woodi ko bonnantu-ma. Kono kanko jiɗeteeɗo o alaa ko bonnanta-mo so añaama so o yiɗaa ma. Alaa heen ko mbaawɗa ustande mo walla ɓeydande mo, nde tawnoo ngaal geɗal immii koto Geno. Sa añii neɗɗo alaa ko ustanta-mo, alaa heen kadi ko bonnanta mo. Kono aan jiɗoowo o ina woodi ɗo bonnanta ma, inde woodi kadi ɗo moƴƴinanta ma. Sa yiɗii neɗɗo ngam Allah ine woodi nafoore mawnde heeriinde nde Geno moƴƴan-ma. Ko hono noon sa añii neɗɗo ko ndeen bonannde kadi ndañata to Geno. Waɗde jiɗeteeɗo o, a waawa bonnande mo. Kadi a waawa moƴƴinande mo. Kala heen ko mbaɗanɗaa-mo immorii-mo koto Geno. So fowru hirsii ñiiwa ñaami ba ha haari ko hoddiro tan kono ine anndaa fowru ɓuraani ñiiwa doole.  

NEƊƊANKE GOOTO WIYI:

Sa moƴƴii ko hoyre ma, sa bonii ko hoyre ma. Njooɓaari gumɗo ko sawru. Kono ñalnde dagdu dawi yaataw omo jogii koyɗe. So en njehii laakara gooto fof yaataw ine yooɓino ko adii balloowo mum ine yottoo ɗum. Ko ɗuum saabi Pulaar wiyi weli wallude ko duudotooɗo, kono Wonaa biyɗo fiyam ha nde tampuɗaa fof !   Sibu geɗe ɗiɗi ine ngona he neɗɗo so yehii ha ɗe tiɗɗii ma he neɗɗo ɗe mbay kono ndiyam mbonɗam woyi he comcol nih. So ɗam naati he comcol kanngol fof ngol ñoomitto haa ngol laaɓa cer. “Mawnikinaare he haasidaagu, ko ɗe ñawu mboros bonɗo, kannje ɓuri mboros bonde; ko ɗeen geɗe ɗiɗi ngaddunoo halkaare firawna, en mbaɗiino daartol mum seeɗa he winndannde men ɓennunde”. 

NEƊƊO:

Ko teskaade ko o miijoto nde o miijoto he mo o miijanto ɗum. Haaltitde ɓernde mum. He wootere Kaatume Ceerno Jalaali Diine Bah; nde “Lakdari” o wiyi: woto tefir tagaaɗo ko ine tikkinira tagɗo. Haandi he tefoore ko tagɗo). Neɗɗo jogii ko tommborɗe tati (3); sa bettii neɗɗo mbiyataa mo: ko miijotoɗa, walla ko mooftuɗa, walla ko kaaɓɗa. Hakkille mooftat, miijo miijoto, ɓernde jogii ko pellital gollal. Reɓo ɗee diiwe tati ine kaani senaade. Wiyi neɗɗo neɗɗo ko geɗe tati (4) caggal tago ngo. Ko hakkille miijo ɓernde. Ɗee tati kala heen ŋakkungel neɗɗo o aayoto. Ɓaawo ɗuum: anndude ko haalata, anndude nde haalata, anndude ɗo haalata, anndude ɗo haaɗata. Ɗe geɗe ine njeyaa he ballitooje aadee he mbaydi nguurndam mum. Neɗɗaagu (k) so ittaama he neɗɗo ko ɓuri mawnude he makko ko itta. 

Kuɗol Ngenndiyanke Joob, winndiyanke.