Nguurndam Ceerno Alh Muhammadu Saydu Bah

En njoofiima e winndannde men ɓennunde nde ngam siftinde haa jooni ko nguurndam ceerno mawɗo ndee winndannde joofi. Ɗum noon tawde janngoowo o fuɗɗiima jappude noppi eɗen njokka, e nguurndam o ceernaajo baɗnooɗo nguurndam mum fof e diine lislaam e sunna Nulaaɗo Allah s.a.w", kono kadi teskoɗen Alh Muhammadu saydu Bah ko kaaƴe tati kaatane tammbinoomo; maa en limoral ɓeen seerenɓe hohooɓe diine lislaam : Ceerno Hammee Baaba talla, to Ciloñ koyle ndaga jeeri e Nammaaje, wuro Hammee Baaba Talla rta", e Ceerno Ahmadu Baro mo Mbuur", e ceerno Seydil Alh Aali Caam mo Madiina Alhajji Aali Caam rta”, walla mbiyaa Madiina Gunaas wuro giɗo makko sehil makko, almuudo makko Ceerno Alh Muhammadu saydu Bah rta yoo yurmeende mbajjiri won e maɓɓe (Aamiin).

Eɗen njokka
Nde ceerno mawɗo yiyndiri e ceerno Ahmadu Baro, teskoɗen kala nde mbiyɗen ceerno mawɗo ko Alh Muhammadu saydu Bah njiɗɗen njoofaade; nde ceerno mawɗo yiyndirta e ceerno Ahmasu Baro oon sahaa tawii o jogii ko duuɓi les-lesiiji seeɗa, omo yahra e duuɓi 28-9 "eɗen nganndi o yiy aduna ko hitaande 1900= o wirnii gite yimɓe ko hitaande 1980" yoo yurmeende mbajjiri won e makko (Aamiin). Ndeen Ceerno Ahmadu Baro wiyi Ceerno mawɗo ardo njuulna, ndeen ceerno mawɗo salii juulnude, o wiyii alaa ko ceerno Ahmadu Baro juulnata. Kono salaade mo juulnude ine waɗnoo sabaabu, sibu duuɓi jeenay o wonnoo Ciloñ ɗi, to ceerno Hammee Baaba Talla omo yottii e hadara Allah ɗo duuɓi makko njottaaki, ko ɗuum saabi so o dariima omo juulna o wonata ko siññude, so o dariima kanko ceerno mawɗo ɗo o noddata Allah to koyɗe makko ɗee mbaawantaa ɗum, ndeen so o habbirii tan o yanat rta kanko ceerno mawɗo. Jooni noon o yiɗaa ceerno Ahmadu Baro tina ɗuum, ko ɗuum waɗi sabaabu wiyde mo o juulnata. Ceerno Ahmadu Baro noon ko ɗuum addi ɗum ko haa itta-ɗum e makko rta; sibu ceerno Ahmadu baro ko o ceerno jottinoowo Allah ko o jom ganndal keeringal”. Ndeen ceeeno Ahmadu baro jokki juulni dental ngal, ɓaawo ɗuum ɓe kooti galle, heddii kanko tan C, Ahmadu baro e ceerno mawɗo omo jannginamo fotde ko o fodi jannginde mo. Ha takkosaan yonti ɓe njehi to jamaa juuloyde. Sappeeji ɗi mbaɗaa haa gasi, ceerno Ahmadu Baro wiyi ceerno Alh Muhammadu Saydu Bah ardo njuulna, ceerno mawɗo fokkiti fayi e mihram jumaaka ngam o juulna, woowno kala nde o suutu juuɗe makko o wiyi Allaahu Akbar tan o wona e dimmbaade. Nde o habbri nde o dimmbaaki, juulni waktu o hay huunde heɓaani-mo, o juulni waktu o haa gasi, ko takkosaan wonno. Nde njuuli haɓe ngayni ɓe payti galle, ceerno Ahmadu baro haalaani hay huunde, ceerno Alh Muhammadu saydu Bah haalaani hay batte. Ɓe ngoni galle haa futuro yonti, ɓe ngarti ngam juulde futuro ngo, ceerno Ahmadu baro wiyi ceeeno mawɗo juulnu o immii e yamiroore ceerno makko o juulni o habbiri hay huunde heɓaani-mo, ɓe njuuli haa ngayni hay huunde heɓaani, ɓe mbaɗii fajiifa maɓɓe haa ɓe ngayni. Ndeen ɓe noddini ngam juulde geeƴe, o juulni kadi geeƴe haa gasi, ko ɗii waktuuji tati ceerno Ahmadu baro ittiri jasbu ceerno mawɗo rta.

Ujunnaaje ɗiɗi salaatul faatihi.

Eɗen njokka tawde janngoowo o fuɗɗiima jappude noppi no moƴƴi.

Ndeen ceerno Ahmadu baro yamiri yoo ceerno mawɗo janngan-mo ujunnaaje sappo e ɗiɗi salaatul faatihi, o sasi ɗum ceerno yoo gollan-mo ɗum hade weetde. Ceerno woni heen haa weeti roŋki gaynude. Haa jamma ɗiɗaɓo o, o janngi kadi o roŋki gaynude, haa wetndoogo o woni e janngude ɗayiibu ngam jokkitirde ɗum salaatul faatihi o; nde yehi haa weeti ceerno Ahmadu baro laaɓndii-mo so o gayni, o wiyi o gaynaani kono o waɗii (yaa-ɗayiibu)=njaafoɗon so waɗii pergitanɗe ko e men woni wonaa e taarik o. Ko ndeen ceerno Ahmasu baro wiyi mo mbiymaa-mi ko Salaatul faatihi limaaquliqa wala khaatimili maa sabaka naasiril haqqi-bil haqqi. Ndeen Alh Muhammadu saydu Bah wiyi ceerno Ahmadu baro ko maa njantaa heen, won wiyɓe ceerno Ahmadu baro rta itti ko caggal wutte mum rokki Alh Muhammadu Saydu Bah yoo ɓoorno, won wiyɓe kadi ko wutte makko jaati o rokkimo yoo ɓoorno. Nde o ɓoornii wutte ceerno Ahmadu baro nde tataɓal jamma tawii o gaynii ujunnaaje sappo e ɗiɗi salaatul faatihi ɗe. Ndeen Ceerno Ahmadu baro rta wiyi Alh Muhammadu saydu Bah hannde kam a gayni, kanko jaati o anndii Ceeeno mawɗo gaynii ko o sasnunoo-mo ko. Ɓe ngondii ko balɗe sappo. Ceerno Ahmadu baro yamiri yoo ceerno mawɗo yah to ceerno Alh Aali Caam to Madiina seydil Alhajji. Sibu kanko ceerno Ahmadu baro rta o anndii kamɓe ɗiɗo koɓe neɗɗo gooto, ko wutte gooto ɓe ɓoornodi.

Ndeen o yamirii yoo ceerno Alh Muhammadu saydu Bah yah to ceerno mum Alh Aali caam ngam o yiyoya ɗum. Ndeen kanko ceerno Ahmadu baro ɓenni o fayi Koddiwaar ngam jokkoyde ɗanngal makko lislaam-yankeewal. Ndeen ceerno mawɗo ɓernde makko mawni e yiɗde yiyde ceerno Alh Aali caam. Ndeen ceerno wayniima  kaaw mum Ceerno Ahmadu tuure ngam yahde Madiina Alhajji yiyoyde seydi Alh Aali caam. Ceerno Ahmadu tuure wiy-mo Seydil Alh Aali caam maa ar haa ɗo, ko o garoowo ɗo ɗee balɗe so o arii maa mi hollondir on; sibu kanko seydil Alh Aali caam omo jogii Daaka ɗo wiyetee Soɓɓulde hitaande kala omo heewi waɗde ɗoon Daaka so o arii maa mi hollondir on. Ñalnde Seydil Alh Aali caam arata nde tawii omo wondi e dental mawngal fulɓe Ngaaɓu raneeɓe tal, ɓe tiiɗe mum en mbaɗi annoraaji tijjaaniyankaagal, aɓe ngondi e ceerno ganndo o, waliiyu Allah o, Ceerno Alh Aali caam rta yoo yurmeende Allah won e makko (Aamiin). Ngaal dental ko dental laaɓndal socciraaɓe sunna Nulaaɗo Allah s.a.w ", so a yiyɓe a anndat ko fulɓe raneeɓe tal, taweteeɓe pulaagu, yooɗɓe saɗne. Ndeɓe njottii nde ɓe njippii ko jamaa, ɓe njuuli haɓe ngayni ko ɗoon ceerno mawɗo adii nande daaɗe Allaahumma anta salaam. Ceerno mawɗo ko e dental Seydil Alh Aali caam o adii nande Allaahumma anta Salaam, tawa ko daaɗe dow; hakkee ko o welti o giddi haa dow hakkee weltaare. Hono kaaw makko o wiy-mo deeƴ tan soɓe ngarii ko ɗo ɓe njippoto, Ahmadu tuure kaaw mum ceerno Seek siraaji Diine, Seek Alh Muhammadu Saydu Bah yoo weleede Allah won e makko (Aamiin).

Kuɗol Ngenndiyanke Joob
Mo Rabaat, Madiina Gunaas.