Jimol Laamɓe afrik

Laamɓe afrik ko lañɓe afrik e weraango mum.

Feccuɓe leñƴi jiiduɗi e koɗorɗe mum.

Laamɓe afrik ɓe ngonaa laamɓe afrik. Ko lañɓe afrik e ɓesngu mum.

Feccuɓe lugge e keeri kaaɗtuɗe mum.

Walluɓe añɓe e warde boli men.

Alfaa aflii bonannde ngenndi mum.

Laatiiɗo haaside lomti mbarallu e baɗe mum.

Alfaa konndee wonaa Ak, ko Alfaa fotnoo jannginde ɓiɗɓe leydi e hisnude e fonndude jaagorɗe e wambude ɗum.

Reende kisal ɓesngu e wallitde ɗum.

 Tafde tippudi kesiri e sañde ɓesngu haa laato birol sañtude miijo gaynataa.

Kabrirɗe kabrii, ayawuuji kollirii hitteende maa e ɓesngu leydi maa.

Alfaa konndee, wonaa alfaa konndee ko alfaa soñnjee mo miijaaki ñalnde tonngee kaɓɓee Qabri kollee.

O wonaa ƴiiwoonde demminaare njabbee gawri ngaawe so fuɗii ndemee so ɓenndii coñee galle nawtee ɓesngu ñaamminee.

Ko alfaa konnde golle kollee ƴiiwoonde fadee, remiyankooɓe keppii gawri nguuli ndeen ƴiiwoonde feŋtoo tan ɓerɗe caytoo yaakaare rutto ɓerɗe cunoo aan laatiiɗo gorbal no kormbal pelluɗo piyanɗe tuyi tuyi no fuyi.

Somi heɓii ɗerewol fuuta jalon maa mi laato ɓiyi ngenndi Gine mi fellat piyanɗe jihaadi tuyi tuyi tawa ko ñootde hakkunde leñƴi e ɓure ɓurnaaɗe ngenndi e darnude ɗum, mi faabo fulɓe e tippudi ɓamtaare mum.

So pulaar mi jannginat so pinal e toowal mi aawat, haa mi laato sellu Dalen Jallo no jiɗɗo ngenndi mo fiɓnde fiɓtataa pelluɗo piyanɗe tuyi tuyi wiyi yoo bone suyi.

Wiyi jam artii e ngenndi fuuta jalon.

Haa labe laboo laabi ɓure e ɓamtaare.

Haa kunndaara hunnda cuuɗi laato fuutaaji, ganndal e pinal e toowal laato kunndaara.

Gine-Bisaawo

Umaru mbaalo laamɗo cuusɗo goonga ɗaminoraaɗo moƴƴere e daranaade kisal ɓesngu leydi.

Biyɗo ko potal e ndimaagu njogitii leydi, nuunɗal e peewal cihnata ɓure ɓurnaaɗe ngenndi.

Potnduɗo ɗemɗe leydi paarnortooɗo pulaar e paykaaji mum.

Ɗo miijiimi laamɓe senegaal ɗo pulaar haɗaa fotde mum ɗawaa.

Mbiɗa yeeɓa Muhammed buhari e darnde mum.

Pulaar e pulareeje haa to galle laamorgo e ngenndi mum.

Laamɓe afrik ko lañɓe afrik e ngootaagu mum.

Makki ko lunndiiɗo doosgal leydi jamirooje mum.

Ɓamtuɗo jolfe e jolɗe mum.

Holko laamu leydi senegal golli e fuuta mum?

Ko laaɓndal no pirtuɗo ngal haaldi goonga Geno gooto mum.

Oon ko pelluɗo jihaadi Geno gooto mum no yahnooɓe badiri ngam semmbinde diine e ɓure mum. 

Kuɗol :

Ngenndiyanke Joob.

Rabat Madiina Gunaas